خاص| ننشر نص اعترافات المتهمة ببيع طفلتها مقابل 150 ألف جنيه: كنت عايزاها تعيش أحسن (مستند)
باشرت نيابة الهرم، بجنوب الجيزة، التحقيق مع شخص وزوجته، لاتهامهما ببيع طفلتهما حديثة الولادة على صفحة "فيس بوك"، بمقابل مادي 150 ألف جنيه في الهرم
حبس المتهمين وايداع الطفلة بمؤسسة
وأمرت النيابة بحبس الشخص وزوجته، 4 أيام على ذمة التحقيقات، لاتهامهما ببيع طفلتهما عبر الفيس بوك، وجدد قاضي المعارضات حبسهما 15 يوم، وتم إيداع الطفلة بمؤسسة معا لإنفاذ إنسان عقب إخطار المجلس القومي للأمومة والطفولة.
وحصلت بوابة "الفجر" على نص اعترافات المتهمة ببيع طفلتها حديثة الولادة عبر صفحة على "الفيس بوك" في القضية التي حملت رقم 12061 لسنة 2023، وجاءت التحقيقات كالتالي:
س: ما اسمك، وعملك؟
ج: بسمه حسن إسماعيل عبد الكريم، 36 عامًا، عاملة تنظيف ببني سويف
س: ما قولك فيما هو منسوب إليك من أنك مهمة بالاتجار في البشر عن طريق تعاملك في الطفلة المجني عليها بالعرض للبيع مع كونها عديمة الأهلية وكونك إحدى أصولها؟
ج: انا كنت عايزة حد يتبناها لكن مقصدش بيعها
س: ما قولك فيما هو منسوب إليك من أنك متهمة بتعريض الطفية المجني عليها للخطر؟
ج: انا مكنتش أقصد أضرها
س: ما تفصيلات إقرارك؟
ج اللي حصل أن أنا عرفت أن أنا حامل وفي الشهر الرابع بس أنا وجوزي / عادل سيد محمد حالتنا المادية صعبة جدا، ومش هنستحمل نجيب طفل ثاني نصرف عليه فأنا حاولت أسقط بس معرفتش لأن الدكاترة قالوا أن خلاص وقت طويل عدى ولو حاولت أسقط ممكن يكون في خطر على حياتي، بعد كدة عادل كلمني وقال لي ان في ناس
مش عارفين يخلفوا ونفسهم في ابن أو بنت فعرض عليا أن انا لما أولد اللي في بطني نديه لحد يربيه، في الأول أنا كنت رافضة بس هو بعدها أقنعني خصوصا إنه قال لى أن العيل اللي هيتولد ده هيعيش حياة أحسن لو اديناه لحد بدل ما يعيش محروم معانا فأنا وافقت.
وفعلا لما ولدت وجبت بنت قال لي أنه اتفق مع واحد أنه ياخد مننا البنت خدني معاه الميدان الرماية ولسة هنروح نقابل الراجل اللي هو متفق معاه وكان راكب عربية لقينا الحكومة، قبضوا علينا وخدونا قسم الأحداث وفضلت هناك لحد ما جابونا النيابة النهاردة
س: ما هي حالتك الاجتماعية؟
ج. أنا متجوزة وعندي 3 عمال
س: ما طبيعة عملك؟
ج أنا بشتغل بنضف شفق وسلالم وكده يعني
س: ما هي حالتك المادية؟
ج حالتي المادية صعبة لأن ان باحد زي ما قلت 800 جنيه، دخل قليل فجوري يدوب بيأخد ٢٥٠٠ جنيه مش بيقضونا
س: ما مستواك التعليمي؟
ج: أنا متعلمتش خالص
س: هل لديك أبناء؟
ج بنتي الكبيرة فاطمة عندها ٢٠ سنة وابني الوسطاني حسن عبده 17 سنة وابني الصغير الحسيني عنده 11 سنة.
س: ما مستوى أبناءك التعليمي؟
ج: محدش فيهم متعلم
س: هل كنت تنوين إنجاب طفل آخر؟
ج: لا بالعكس انا كنت مقررة مع جوزي اننا مش هنخلف ثاني.
س: كيف حدث حملك بالطفلة المجني عليها رغم قراركما بعدم الإنجاب؟
ج: الحمل ده حصل بالغلط مش بإرادتنا
س: هل حاولتما إجهاض الطفلة المجني عليها ؟
ج: أيوة أنا حاولت أسقطها بس الدكاترة قالوالي أن ده ممكن يبقى خطر على حياتي.
س: ما الذي قررتيه بخصوص الطفلة المجني عليها ؟
ج: أنا كنت خلاص هولدها وأخليها معانا عادي بس عادل هو اللي كلمني في موضوع أننا ندي الطفلة دي لحد تاني
س: ما الذي أخبرك به المتهم الأول ؟
ج: هو قال لي أننا مش هنقدر نصرف على الطفل اللي في بطني وأولادنا عايشين معانا في فقر.
