حتى الملابس الداخلية بتتفتش !
مساء الخير يا سادة ,
مشكلتي مع مراتي الغيرة الشديدة , الموضوع بيوصل الى انها بتفتشني ذاتي اول ما ادخل البيت وفيه تفتيش تاني بعد ما اقلع هدومي خاصة الملابس الداخلية , زهقت وقرفت من كتر ما فهمتها اني لا يمكن اخونها مش علشان انا كويس لا ولا عشانها .. علشان انا قرفت من صنف الستات كله واستاهل اللي يجرالي لو فكرت في ست تاني , بالذمة مين يتجوز مرة يقوم يجيب لنفسه بلوة تانية , ده انا مش عارف اخلص من الهم اللي انا فيه الأول , اقسم بالله بتهيألي لو طلقت الولية دي هعيش لواحدي بقيت عمري ملك زماني
المصيبة بقى ان بالرغم ان معنديش أولاد عشان يكونوا دراعي اللي بيوجعني والهانم تذلني بيهم اللي اني مش قادر اطلقها عشان المؤخر كنت كاتبه مبلغ كبير جدا مش عارف عملت في نفسي كدة ازاي !!!! وكل اللي هقدر اعمله اني افضل احوش سنين مثلا عشان اخلص من الست دي وحتى لو قدرت احوش المبلغ حاسس انه خساره فيها مع انه شرع ربنا , بصراحة انا عارف ان مشكلتي ملهاش حل غير يا إما أموت واغور في داهية من وشها يا إما هية تموت أو ربنا يرحمنا بقدر من عنده معرفش هوة ايه يزيح المصيبة دي .. على فكرة انا باعت مشكلتي لسبب واحد بس والرسالة دي لكل الرجالة , ياريت يا بهوات ما تاخدكوش العزة والجلالة أوي وتكتبوا مؤخر كبير عشان لما تقعوا في الهم ده تلاقوا حل مش تتوعكوا زيي , ياريت تكون الرسالة وصلت .. سلامو عليكم .
حسن
