مروة كامل تكتب .. يوم الجمعة "ختامها مسك"
اعرفكم بنفسى (انا يوم الجمعة) عارفين انا لية اتسميت بالاسم دة علشان الجمعة جاية من الجمع لان المسلمين بيتجمعوا مرة كل اسبوع من اول الوزير لحد الغفير (طبعا فى صلاة الجمعة)انا اليوم اللى اتخلقت فية السموات و الارض انا اليوم اللى اتخلق فية سيدنا ادم وفية دخل ادم الجنة وفية اخرج منها و هتقوم فية يوم القيامة .
انا اخر الاسبوع انا الاجازة الرسمية للمدارس و الجامعات و كل المصالح الحكومية و القطاع الخاص انا يوم الراحة وتجديد النشاط يعنى بالبلدى كدة انا يوم الرحرحة و الانتخة انا الفاصل بين الاسبوعين انا يوم المشاوير العالمى و الزيارات العائلية و الخروج و الفسح انا يوم تكدس الحدائق و الملاهى و النوادى و السوبر ماركت و عروض المنتجات و الاوفر وانا اليوم الوحيد اللى فية تذكرة النادى بتكون اغلى من اى يوم انا يوم الزحمة المرورية ويوم الشوبنج الاسبوعى انا اليوم الرسمى لتنضيف البيوت و رائحة البخور انا يوم الاسرة و العائلة انا اكتر يوم مطاعم الفول و الطعمية بتبيع فية ساعة الصبحية انا اليوم الوحيد اللى لو دخلت فية اى جامع فى و قت صلاة الظهر حتصلى ركعتين مش اربع ركعات انا يوم المناقشات المصيرية للاسرة انا يوم اللمة ع السفرة انا يوم لبس الجلاليب للرجال و يوم مسك السبح انا اليوم الوحيد اللى الجيران بيتقابلوا ع السلالم فى و قت واحد (وقت صلاة الجمعة)انا اليوم الوحيد اللى قراة سورة الكهف فية سنة عن رسولنا الكريم انا اليوم اللى بيتعمل فية كل الحاجات المتأجلة طول الاسبوع انا اليوم اللى مواعيد غلق النوادى و الملاهى و الحدائق بيتأجل عن اى يوم تانى باختصارانا يوم كل الحاجات الحلوة (يعنى ختامها مسك)
