ريجيم بدون حرمان لجسم مش مليان‎

لكل الناس اللي عايزة تبدأ ريجيم متوازن علشان تقلل من وزنها بشكل صحي، النهارده د. محمد أبو الغيط -الأستاذ بكلية طب جامعة القاهرة وسكرتير عام الجمعية الطبية المصرية لدراسة السمنة- هيقدّم لكم ريجيم أسبوعي تقدروا تمشوا عليه معانا وتبعتوا تقولوا لنا على النتيجة، وتسألوا في كل المشكلات اللي قابلتكم مع الريجيم..

لكن في البداية لازم نكون عارفين، إن الريجيم ده هيكون مناسب للناس اللي ماعندهاش أي مشكلات أو أمراض زي الضغط أو السكر، واللي بتحتاج لريجيم خاص شوية علشان يناسب حالتهم الصحية..

وقبل ما نبدأ في الريجيم فيه شوية نصايح بيقدّمها لنا د. محمد، علشان تساعدنا في تقليل الوزن..

- العودة لنمط الأكل الصحي عن طريق تناول كميات كبيرة من الفاكهة والخضراوات الطازجة، والابتعاد عن الأكلات الدسمة والوجبات السريعة.

- زيادة معدل الحركة اليومي وممارسة الأنشطة الرياضية، زي المشي والجري والسباحة واستخدام السلالم بدلا من الأسانسير.

- الاهتمام بتناول وجبة إفطار صحية، والتقليل من عادة تناول الأكل أمام التليفزيون بالليل.

ريجيم الأسبوع الأول

الفطار:

½ رغيف بلدي أو عيش سن + فول (مع نقطتين أو تلاتة زيت) أو بيض أو جبنة لايت أي نوع (يفضل قريش) + سلطة

الغداء:

اليوم الأول: شوربة عدس + عيش + سلطة + خضار

اليوم الثاني: رز مسلوق + سمك مشوي + سلطة + خضار

اليوم الثالث: فراخ مشوية + سلطة + خضراوات بدون نشويات

اليوم الرابع: لحمة أو فراخ أو سمك + رز+ خضار + سلطة

اليوم الخامس والسادس والسابع: لحوم أو تونة أو بيض + سلطة بدون نشويات

العشاء

عندنا أكتر من اختيار بالنسبة لوجبة العشاء..

- طبق خضراوات مشكّلة أو سلطة

- طبق فواكه مشكّلة

- بيض + سلطة

- تونة + سلطة

ملحوظة:

1- الأكلات اللي كميتها غير محددة، نقدر ناخد منها أي كمية لكن بدون مبالغة.

2- يمكن استبدال النشويات ببعضها، يعني ممكن نستبدل الرز بالمكرونة أو العيش، ونفس الشيء بالنسبة للبروتينات، يعني ممكن نستبدل السمك بالفراخ.