نهال عنبر في حوار لـ«الفجر الفني»: حياتي الشخصية كتاب مقفول.. وبعشق أدوار الشر (فيديو)
كشفت الفنانة القديرة نهال عنبر، عن تفاصيل دورها الجديد في مسلسلها المرتقب "غموض"، والذي تصفه بأنه عمل يحمل الكثير من المشاعر والمواقف.
كما تحدثت في حوار خاص مع "الفجر الفني"، عن كواليس التصوير مع فريق العمل، وكشفت عن رأيها في مدى تأثير هذا العمل على الجمهور،، وإلى نص الحوار
ما هي تفاصيل دورك في مسلسل "غموض"؟
المسلسل تأليف الأستاذ فتحي الجندي، وإخراج الأستاذ أحمد سلامة، وانتهينا مع نفس فريق العمل مؤخرا من فيلم "جبل الحريم" وهو فيلم جيد جدا وسيتم طرحه شهر سبتمبر المقبل، طبعا لما الأستاذ وليد كلمني عن المسلسل وأنا قرأت الدور وجدته حلو جدا وفيه أحاسيس ومشاعر حلوة أوي وهم عشرة عمري وعارفه شغلهم، فقبلت طبعا الدور، والحمدلله كلهم ممثلين مميزين ونجوم.
ماذا لو توفرت كل هذه الأشياء في المسلسل ولكن دورك لم يكن محبوب لك أو سيضيف لك هل ستقبلي تجسيده؟
لا طبعا لم أقبله لأن لو مش حابه الدور مش هعرف أمثله لان أنا بمثل بإحساس، إحساسي اللي بيشتغل ودموع طبيعية لازم أكون بعيط طبيعي حتي أو حطوالي أي حاجة مش هعرف غير لو حاسه المشهد، وإن شاءلله الدور يعجبكم والعمل يعجب الناس.
كيف كانت الكواليس مع فريق العمل؟
طبعا أستاذ حسام عاوزنا نشتغل 24 ساعة ولكن الوقت اللي مش بنصور فيه وفاء عامر جبتلنا رنجة، والكاست كلنا بنحب بعض فالقعدة بتبقي لذيذ.
من وجهة نظرك هل العمل هيلمس قلب الجمهور؟
إن شاءلله هيعجب الجمهور في أحداث كثيرة وفي أحداث جامدة وهيعجبكم إن شاء الله.
حدثينا عن أحداث أعمالك؟
انتهيت مؤخرا من فيلم جبل الحريم وشغالين في غموض حاليا.
ما هي تفاصيل الحالة الصحية للفنان أحمد رزق والوعكة الصحية التي تعرض لها؟
مش مصدقة كل ما قيل عن حالته من شائعات، الراجل كان عنده مشاكل في القولون وتم علاجها بالمنظار والموضوع خلص.
الفنانة نهال عنبر تفضل السوشيال ميديا أم لا؟
هي مهمة طبعا بس أنا مبحبش المواقع اللي هي من تحت السلم لما تنزل خبر وتلاقي كله منزل أخبار وبتبقى غلط أنا بحترم المواقع اللي بتكلمني وتتأكد من الخبر، ويسالوا الخبر ده صح ولا غلط فانا اقوللهم صح ولا غلط أو يكلموا دكتور أشرف زكي أو أي حد من المجلس لان أحنا بنكون عارفين، لكن اللي بيأفور ده لا.
أنا بحب السوشيال ف شغلي في جائزة حصلت عليها في برنامج عملته ، ولا أحب أن أشارك حياتي الشخصية على السوشيال ميديا لأن حياتي الشخصية كتاب مقفول.
هل ممكن الفنانة نهال عنبر تعمل تيك توك في يوم من الأيام؟
لو هعمل حاجة تفيد الناس أعمل عادي، اللي ماسكين السوشيال ميديا بتاعتي بيتحايلوا عليا اني أعمل كده، وأنا اصلا مش بهتم بالحاجات دي أوي أنا بهتم بالحاجة اللي هقدمها للناس مش بهتم بالفلوس.
لماذا معظم أدوار نهال عنبر في الشر؟
لا،، عملت دور في "سابق إنذار" لم يكن دور شر، أنا فعلا بحب أدوار الشر جدا، وتليق بي أكثر، وأنا في الحقيقة مش كده خالص.
