أقوال مثيرة لزوجة المتهم بقتل ابن عمه في المنيب (خاص)
حصل موقع "الفجر" على أقوال زوجة المتهم بقتل ابن عمه بسبب شكه أنه سرق منه 4 آلاف جنيه، فاصطحبه لأرض خالية وقام بالتشاجر معه وعلى إثر ذلك طعن المتهم نجل عمه بسلاح أبيض أودى بحياته.
في السطور التاليه سنعرض أقوال "حنان محمد" 27 سنة ربة منزل، زوجة المتهم بقتل ابن خالتها في تحقيقات النيابةالعامة.
س: ما هي صلتك وعلاقتك بالمتهم علاء حسين حسن علي، تحديدًا ؟
هو جوزي
س: وما هي صلتك وعلاقتك بالمجني عليه سيد محمد حسن علي، إذا ؟
هو ابن عم جوزي وابن خالي
س: وما هي تفصيلات شهادتك تحديدًا ؟
اللي حصل ان انا كنت راجعه شقتي وأول ما دخلت المدخل لقيت سيد محمد حسن، الله يرحمه واقف قدام باب الشقة وأول ما شافني اتخض وارتبك وعمل نفسه بيخبط على باب الشقه ولما سألته انت واقف كده ليه، قالي انا بخبط علي علاء ومحدش بيرد قولتله علاء بره ولسه مجاش وحسيت إنه عامل حاجه فطلع هو شقته اللي في نفس العمارة بتاعتنا.
وانا بفتح باب شقتي لقيت الباب مفتوح اصلا مع اني كنت قفلاه بالمفتاح قبل ما امشی، وساعتها شكيت في سيد إنه دخل الشقة وخد منها حاجه ولما دخلت الشقه علشان اتأكد لقيت كل حاجه في مكانها والشقة مكنتش متبهدله وكلمت علاء جوزي وقولتله علي اللي حصل وجه من بره، وقالي إنه كان شايل فلوس 4000 جنيه في اوضة النوم ومش لاقيهم وقالي اكيد سيد دخل الشقة وخدهم بس انا معرفش إنه كان فيه فلوس اصلًا، وقالي انتي شوفتيه وهو معاه فلوس قولتله لا مشوفتش في ایده حاجه، راح طالع لعلاء شقته وقاله فين الفلوس، وانت دخلت الشقة وسرقت منها فلوس علاء رد عليه وقاله انا مخدتش حاجه ومدخلتش الشقة وأنكر وقعدو يتخانقوا بصوت عالي ويشتموا بعض.
واستكملت زوجة المتهم: جوزي قال لسيد تعالي ننزل الغيط اللي جنب البيت ونتكلم هناك بدل الفضايح دي وفعلًا نزلوا وراحوا الغيط وبعدها بنحو عشر دقايق لقيت علاء جوزي رجع وبيقولي انا ضربت سيد بإزازة واتعور قولتله ليه كده حرام عليك، وهو جراله ايه قالي مجر الوش حاجه اتعور تعويرة بسيطة قولتله طيب تعالي نروح نجيبه ونوديه المستشفى قالي لا ملكيش دعوه انتي انا هروح اجيبه، وراح علشان يجيبه ثاني من الغيط وركب توك توك من الشارع وانا نزلت الشارع وفضلت واقفه مستنياه يرجع لقيته راجع ومعاه سيد في التوك توك وبينزل دم من صدره ومغمي عليه ومبيتكلمش ركبت معاهم التوك توك وروحنا علي بيت ايمن اخو سید ونزلنا وركب معانا وعلاء جوزي قاله انا معرفش مين اللي عمل فيه كده وإنه لقاه مرمي في الغيط وطلعنا على مستشفي ام المصريين العام وهناك قالولنا ان سيد مات والمباحث جت خدت جوزي من المستشفي، وهناك انا قولت لأيمن علي كل اللي حصل وان علاء جوزي هو اللي ضرب سيد وعوره وقولتهلم في المباحث علي كل اللي حصل وهو ده كل اللي انا اعرفه عن الموضوع.
س: ما قولك فيما ثبت بمناظرة النيابة العامة لزوجك المتهم علاء حسين، من وجود اثر ( خدش ) بجوار العين اليسري ؟
الخدش ده كان حصله قبل الواقعة بيوم علشان كان بيشيل الثلاجة بتاعتنا في البيت واتخبط في سن باب الثلاجة وهو شايلها.
س: وما قولك فيما أقر به زوجك المتهم سالف الذكر بتحقيقات النيابة العامة من ان تلك الاصابة حدثت له جراء التشاجر مع المجني عليه وبواسطة ضربه بزجاجة؟
لا هو كداب والخدش ده حصله قبلها بيوم علشان كان بيشيل الثلاجة بتاعتنا في البيت واتخبط في باب الثلاجة، واكيد هو قال كده علشان يحاول يبرر اللي حصل
