ربيع جودة يكتب: الاسم حدوتة

.
.. كان في يوم ضفدعة طيبة.. الفيل داس على ابنها متعمد وهو بيلعب.. الضفدع الصغير اتحطم تحت رجلين الفيل.. الضفدعة قعدت تصرخ.. وتستتغيث.. ابني يا ناس الحقوني.. لكن محدش قدر يتدخل.. الأسد والنمور موافقين على اللي عمله الفيل.. والجمل قال أنا ماقدرش.. وفرس النهر متهدد بالنهر... والحيتان والقروش مشغولين بأكل السمك.. والجاموس مش فاهم حاجة من اللي بيحصل.. حزنت الضفدعة جدا.. وحست بضعفها.. لكن كان عندها إيمان كبير بالله يعوض أي ضعف.. ويقين في رب قوي وعزيز.. ينصر الحق ولو بعد حين...فقررت تاخد حق ابنها لوحدها.. راحت للعصفورة.. وقالتلها يا عصفورة ممكن خدمة صغيرة.. قالت لها قولي.. أنا عصفورة ضعيفه زيك.. وأخدمك بعينيا.. قالتها.. تسلمي.. أنا بس طالبة منك طلب.. وإنتي واقفة على رأس الفيل.. تنقريه في عينيه.. خليه يعمى.. وهو مش هيشوفك.. ومحدش هياخد باله منك.. العصفورة وافقت.. وفعلا.. خلت الفيل مش واخد باله.. ونقرته في عينيه.. الفيل قعد يصرخ.. مش شايف.. أنا عميت.. مش شايف.. قعد الفيل كذا يوم.. يعاني.. لغاية ما اشتد بيه العطش والجوع.. كانت الضفدعة في الوقت ده.. متفقة مع الضفدع.. لما الفيل يعطش.. يتجمعوا عند الحفرة الكبيرة.. اللي في آخر الوادي.. وفعلا الفيل بدأ يتحرك يدور على ميه..

 كان الضفدع متجمع عند الحفرة.. وبيعمل صوت النقيق المعروف لما بيبقي في الميه.. الفيل فرح.. واندفع ناحية الصوت.. عشان يشرب.. مد زلومته.. ونزل شوية بشوية.. ويمد زلومته كمان شويه.. لغاية ما فقد التوازن.. ووقع في الحفرة.. فرحت الضفادع.. وهللت بالفرحة.. الفيل الظالم اتكسر.. واتردم تحت الأرض.. والضفدعة الضعيفة المظلومة انتصرت.. وجابت حق ابنها لوحدها.. وتوتة توتة.. معاني مكبوتة.. مقصد كلامنا وجع.. والاسم حدوتة.