التظلم بـ١٠٠ جنيه.. رسائل مخالفات المرور تثير أزمة ومواطنون: مش إحنا

مئات الشكاوى انتشرت بشكل كبير عبر صفحات السوشيال ميديا بسبب رسائل مخالفات المرور التي انتشرت بشكل كبير خلال الساعات الماضية خاصة وأنها تعود لأشهر سابقة حيث يؤكد أصحابها أنهم لم يرتكبوا هذه المخالفات ولديهم ما يثبت ذلك.

رسائل مخالفات المرور

قالت جهاد محمود، إنها فوجئت بتلقي عدة رسائل على هاتفها المحمول تفيد بتسجيل عدة مخالفات خاصة بسيارتها وهو أمر غير مفهوم بالنسبة لها حيث تجاوزت المخالفات 2000 جنيه.

وأضافت جهاد في حديثها لـ "الفجر" أن سياراتها مركونة ولا تستخدمها بسبب ظروف حملها التي تجبرها على البقاء في المنزل كما أن زوجها ليس متواجدا في المنزل أيضا لظروف السفر والعمل.

وتساءلت جهاد محمود: إزاي يعني العربية عملت أكتر من مخالفة وهي راكنة تحت البيت مبتتحركش خالص.

وفي سياق متصل، قالت هبة علي، إنها تلقت أمس رسالة على الموبايل برسوم مخالفة تعود إلى ٦ أشهر سابقة وهو أمر غير منطقي حسب وصفها.

وأضافت هبة، في تصريحاتها لـ "الفجر" أنها تمتلك براءة ذمة بعد هذا التاريخ وهو ما يؤكد أن هذه المخالفة غير صحيحة.

وتابعت: معايا براءة ذمة بعد التاريخ ده، هل أقدر اعترض على ميعاد المخالفة؟.

وانتشرت الشكاوى عبر مواقع التواصل الاجتماعي، حيث نشر حساب باسم (هـ ح) رسالة نصها: يا جماعة حد يعرف حد في المرور يفيدني، عندي مخالفات بتتبعت لي بأثر رجعي من ٦ شهور بقالي أسبوع، المخالفات وصلت ٧ آلاف وشوية، مخالفات من شهر ٢ و٦ و٧ كلها بتجيلي الأسبوع ده فجأة.

واشتكت من نفس الحالة (ع غ)، قائلة: جالي امبارح وأول امبارح أربع مخالفات رادار، أنا من الناس اللي فعلا ممكن تسرح وتتخطى السرعة المقررة بس بحاجات بسيطه، اسمع في بلاد العالم إن فيه نسبة سماح يعني لو السرعة المقررة ستين وأنت جبت خمسة وستين ما تتاخدش مخالفة ممكن تاخد لفت نظر ولو اتكررت تاخد مخالفة.

وأضافت: في مصر لو جبت واحد وستين ولو اتكررت تتضاعف المخالفتين، وتجيلك مخالفات من شهر يونيو وإحنا في سبتمبر، بس ماشي مش هقول حاجه لأني مخالفة فعليا لكن واحد زي أخويا لا يمكن يخالف وأكتر إنسان في الدنيا بيحترم القانون حتى لو مش مقتنع بيه وبيربط الحزام قبل ما يقفل الباب حتى يتاخد مخالفة حزام وهو رابطه والصورة متاخدة من زاوية مش واضحة ده يخليني أقول التزم ليه بقى إذا الملتزم بيتجازى برضه ظلما.

وبسبب تزايد حالات الشكاوى من مخالفات المرور، خصصت صابرين السيد، المحامية بالاستئناف العالي ومجلس الدولة، من محافظة الإسكندرية، قسما بمكتبها لتلقي شكاوى المرور والتعامل معها.

وقالت صابرين، في تصريحات خاصة لـ "الفجر" إنه توجد حالة من الفوضى فيما يتعلق برسائل مخالفات المرور في الفترة الحالية.

وأضافت: جالي شكوى من شخص متصور في يوم إنه واخد مخالفة رغم إن عربيته في اليوم ده كانت في الفحص.

وتابعت المحامية بالاستئناف العالي ومجلس الدولة: شخص تاني كان مريض في اليوم اللي سجلت عليه المخالفات، وفي ناس جايلها مخالفات من شهر ٥ و٦ و٧ في أوقات جددوا فيها الرخص ومكانش عليهم غرامة وقت التجديد.

وواصلت: جالي شكاوى كتير جدا، وفي إثباتات على إن الناس معملتش المخالفات دي، مثلا كلمني واحد مسافر برا مصر وعربيته مركونة واتسجل عليه مخالفات.

وتابعت أن عدد كبير من الشكاوى التي تلقتها في الإسكندرية كانت متعلقة بطريق واحد في سوهاج وهو طريق طهطا رغم أن أصحاب المخالفات لم يذهبوا إلى سوهاج من قبل.

واختتمت: التظلم ب١٠٠ جنيه وممكن تتشال الغرامة أو يتم تخفيضها أو لا تخفض نهائيا، يعني تتسجل عليك مخالفة معملتهاش تروح تتظلم وتدفع ١٠٠ جنيه وممكن تدفع الغرامة بردوا أو حتى لو الغرامة اتشالت أنت دفعت ١٠٠ جنيه دون ذنب