"يا تفكلي العمل يا هقتلك".. ننشر أقوال المتهم بقتل دجال في شبرا الخيمة

حصل موقع "الفجر" على نص أقوال المتهم "محمد.م.ز" 24 عاما فني الوميتال، بقتل دجال بشبرا الخيمة، وذلك بعدما لجأ إليه بعد رؤيته لـ "أشباح وجن في المنزل"، فذهب إليه وأعطاه مشروب فساءت حالته لأسوأ، ما دفعه للتخلص منه لفك العمل، حسب اعتقاده.

في السطور التالية نستعرض أقوال المتهم أمام النيابة العامة:

س/ ما هی تفصیلات إقرارك بتلك الواقعة؟

ج/ هو اللى حصل انى انا بشتغل بتاع الوميتال وكنت فى شغلى من حوالى سنة ونصف، وأنا شغال على السقالة شفت زی خیال بسببه، وقعت من على السقالة وانا شغال وفضلت اتعالج حوالى 3 شهور بسبب الوقعة دي وفى خلال المدة دى حصلت مشكله بينى وبين ابويا وامى وبسببها سابوا البيت وفضلت قاعد لوحدى انا واخويا، ومن ساعه ما بدات القعدة لوحدى بدات اشوف زي خيالات في البيت ويسمع أصوات غريبه، ومحدش يسمعها غيرى، وبدات اشوف بحاجات بتتحرك من مكانها وبدأت اشوف جنية في البيت بس مكنتش بتتكلم معايا.

وأكد المتهم: “لما حكيت لاخويا قالي انت ممكن يكون بتهيألك عشان مش ترتاح، وعلي طول في الشغل وبعدين قابلت واحد جارى فى المنطقة وحكيت له على اللى بيحصل معايا قالي في واحد هنا اسمه عم وليد بيعالج الحاجات دى بالطرق الروحانية، وشغال في الأعمال وفعلا اتفقت معاه وجاللي البيت لوحده وبدا يحكيلي إنه شغال في الأعمال من زمان، وقالي أنت عليك مس شيطاني، وأنا لسه كنت بعالج واحدة زيك كده والحمد لله بقيت كويسة وطلب منى كوباية مايه وبدا يقرأ عليها في سره وبيقول كلام أنا مش سامع منه حاجه، وبعدين قاللى أشربها وفعلا أنا شربتها، وبعد لما شربتها طلب مني ورقة وقلم، وقالى انت هتجيب ليا ملح وميه ورد ومسك وحاجات تانيه انا مش فاكر هى أيه”.

أضاف: “قالي يا بندق انت لازم تفضل تصلي ولو بطلت صلاة الحاجات دي هتفضل تزيد وبعدين مشي، وانا حسيت اني مش مطمناله ومش هروحله تاني، وبعدين الجن بدأ يظهر ثاني من بعد ما ابويا وامي رجعه البيت ثاني، وبعدين بقت بشوفه في صورة جن عندنا في البيت، ومحدش بيكون شايفه غيري وبعدين الموضوع بدا يزيد معايا، وبقيت بحلم بكوابيس مستمرة يظهر لي فيها وليد ومعاه ثعابين سوداء وكلاب شرسة بتموتني في الأحلام، وفضلت على كده لمده كبيره كل شوية بشوفه وبسمع صوته وبيطلعلي في الأحلام، وكل ده حصلي والموضوع زاد معايا من ساعة ما قابلته وشريني المياه اللي جرالي عليها دي”.

وتابع المتهم: بعد كده الموضوع بدا يدخل معايا في اهانات ليا ولاهلي منه لما كان يظهر لي في البيت، وكان بيقولي والدتك ست مش كويسة وابوك راجل مش محترم وبيشتموني بامي ويقولي دي ست وسخة لحد ما انا جبت اخري وبعدين فضلت ادور علي النت في الأعمال والجن والحاجات دي، وعرفت ان لو اللي عمل العمل ده مات ينفك". 

وواصل المتهم اعترافاته بالقول: “يوم السبت الموافق 2022/12/21 نحو الساعة 8:30 كده انا قررت انى هروح لوليد ده البيت واقوله يا تفكلي العمل ده ياما هموتك، وفعلًا جبت سكينة كبيرة من عندي في البيت ونزلت روحتله وخبط على الباب وهو فتحلي، وطلبت منه يخرج لي بره عشان اتكلم معاه، واقوله فكلي العمل اللي انت عملتهولي عشان أنا مش عارف أعيش بسببك من يوم ما قابلتك وعملتلي العمل في كوباية المياه اللي شربتها".

وتابع: "هو في الأول طلعلي من ورا باب العمارة وكان قافل الترياس، وأنا لما فضلت أزعق واطلب منه يخرج بره فعلًا دخل بيته، وقالي انا هغير هدومي واطلعلك دلوقتي روح البيت ونا جايلك اشرب معاك كوبياتين شاي، واحللك القصة دي أنا رفضت اروح البيت وقلت له اطلعلي دلوقتي قدام البيت”.

وأردف: “وفعلًا طلعلي قولتله فكلي العمل ده قالي يا بني عمل ايه انا معملتکش اعمال فروحنا مسكنا في بعض وزعقنا وضربته وبعدين لما فضل عامل فيها عبيط وبيقولي انا معملتكش حاجة، روحت مطلع السكينة من جنبي اليمين وقولتله يا تفك العمل يا هموتك قالي أنا معملتلكش أعمال أمشي من هنا”.

وواصل: “روحت مديلة بالسكينة في صدره ناحية الشمال كده وراح واقع علي الأرض والدم كان في كل حته وـول ما شوفته بيموت روحت خدت السكينة وجريت روحت على الكورنش أول حاجة رميتها في النيل وبعدين قفلت موبايلي عشان محدش يعرف يوصلي”.

واختتم: “روحت استخبيت في حته في الشارع في منطة الفرناوني في شبرا الخيمة، وبعد ما عدي يوم وأنا حسيت اني ارتحت بعد ما هو مات، والعمل فك اتصلت باخويا اطمن عليه قالي يا بندق تعالى سلم نفسك”.