هبة عبدالعزيز تكتب: قطايف … من غير مكسرات (٢)
- نص مسلسلات رمضان ٢٠٢٣ تقريبا قررت توثق إفيهات التكاتك… فمش بعيد نلاقيها داخلة مهرجان الدراما على جائزة " لو إنتوا صحاب الطيارات ف أحنا صحاب المطارات" أو ممكن كمان " لو صاحب خانك أعتبره دخانك" …
- بقلنا كام سنة كده بنتابع دراما رمضان ( ويكأنها ) عبارة عن "كامبين" حملة إعلانات مدفوعة ومحشور فيهم كام مسلسل … شكلنا داخلين الموسوعة "بنفرين" !.
- بيقولك الإتحاد الدولي سحب تنظيم كأس العالم للشباب من إندونسيا بسبب إعتراضها على مشاركة منتخب " إسرائيل" في البطولة…البلد ديه بموقفها ده بتأكد للعالم إن الكيان الصهيونى المعتدى مهما حاول تجميل صورته إلا أنه سيظل منبوذ ولا قيمة له بين الشعوب وسيبقى ملعون فى التاريخ، ومهما كبر طغيانه فهو زائل… شابوه إندونسيا مش زى غيرها !
-لافتة كريمة فى الشهر الكريم من الشركة المتحدة للخدمات الإعلامية على إستجابتها لطلب النقابة في علاج الفنانة والإعلامية شيرين الطحان على نفقة الشركة… ادعوا لها يا جماعة فى رمضان …ربنا يشفيكى ويعافيكى يا شيرين يارب …وجب تقديم الشكر للشركة المتحدة.
- سمعنا في المدنية …إن محطة فضائية تستعين بالإعلامية الكبيرة أوى ا/هناء السمري من أجل تطوير محتوى البرامج.. ياااااه ياعبد الصمد وأخيرًا يا جدعان.
- وكمان سمعنا في المدنية… إنه إتعمل ورشة عمل وتدريب -ليل نهار كده -لمجموعة من المذيعين والمذيعات اللى فرحانين أوى بالموضوع … ياجماعة هو قراية الإسكريبت من الأتوكيو حاجة صعب للدرجة دي!!
وبرده سمعنا في المدينة…. إن ضيوف برامج "حبر سري" و"أنا والقناع" و" العرافة" زعلوا وإختلفوا وإتقمصوا لما عرفوا المقابل المادي بتاع كل واحد فيهم.. ياجماعة والنبى براحة على نفسكم شوية " هى" سبوبة على قدها أساسا أصلا!.
- وآخر واحدة بقى من سمعنا في المدينة… بيقولك فيه قناة رياضية فئوية خاصة بنادي جماهيري كبير فيه ٣ مذيعين منها عايزين يروحوا الشركة الكبيرة …. ماتستعجلوش (كله رايح ) الشركة الكبيرة!.
- ومن بره المدينة سمعنا …. إن وكالة إعلانية كبيرة رفضت شرا هوا في قناة جميلة رقيقة فريدة وليدة ومتهيئة … قالك ؟! بحجة إنها مافيهاش حد معروف … بكرة يتعرفوا وساعتها -ساعتها - هتبقى فى العالى العالى يا ااااابا.. يا بابا يا بابا.
- قرار تسليم الطفل شنودة لأهله بالتبني … ياخد أوسكار أفضل إنتصار للإنسانية… ولا عزاء للمتطرفين والمتربصين عن اليمن وعن والشمال !.
- تحت شعار "عنينا مش خضرة بس الهيبة حاضرة " مني زكي تستعد لحصد كل الفانز في النصف التاني من رمضان.
- بعد فوز الأهلي على الهلال أقدر أقول على طريقة دراما رمضان أن الأهلي " سره باتع" وجمهوره " كبير أوى".
-أنا غير مسئول عن أي تبريريات أو تفسيرات ناتجة عن إفتقاد الناس لفوازير رمضان"
ده كان رد صاحب الإعلان اللى أثار الجدل فى جريدة الأهرام واللى نزل على طريقة (خالتى بتسلم عليك) …. لما سأله زميلنا محمد عمارة بموقع مصراوى عن ردود أفعال (المصريون) على السوشيال ميديا حول هذا الإعلان المريب اللى شفرته قصدى الاستبن بتاعه لم ولن ينزل الأرض.
عموما بونو بونووو … بصوت الفنانة القديرة نادية الجندى.
-آخر حاجة ياجماعة عشان ماطولش عليكم، مش معنى أني كمذيع أو معد مش لاقي تايتل للضيف بتاعي أقوم أقول عليه خبير فن الإتيكيت أو لايف كوتش!! مش كل واحدة شربت شاي من غير صوت بقت خبيرة فن إتيكيت، ولا كل واحد أخد له كورسين فى المركز اللى بإلى بالك بقى طبيب جراح قلوب الناس يداويها وياااا ما جرااااح سهر الليل يداريها … إرحمونا يا جماعة بجد الناس مش ناقصكم والدنيا صيام.
