"زوجت ابني بدري لإي هتجنن على العزوة وكنت طفلة شقية وأحفادي بيغيروا عليا ".. أبرز تصريحات نهال عنبر

حلت الفنانة نهال عنبر،  ضيفة على برنامج " واحد من الناس " مع الإعلامي عمرو الليثي على شاشة الحياة الفضائية،  بصحبة احفادها ياسين ويوسف، احتفالا بمناسبة عيد الأم الذي يتزامن اليوم 21 مارس من كل عام، وتحدثت "عنبر" عن حياتها الأسرية مع نجلها الوحيد وأحفادها،  لذلك نستعرض أبرز تصريحاتها في السطور التالية. 

نجاح نجل نهال عنبر ومفاجأة محمد صلاح

قالت الفنانة نهال عنبر إنها سعيدة جدًا بنجاح حسام ابنها فى حياته المهنية وانا دايما بدعمه حتي ينجح أكثر وأكثر في مجال الإخراج. 

وأضافت، أنها سعيدة جدًا بنجاح حملته الإعلانية مع النجم محمد صلاح، وحسام غاوى مقالب، وهو بيصور الإعلان مع محمد صلاح في لندن، قال له "اديني مامتك أكلمها أنا بحبها جدًا، وسيبني أنا أكلمها من تليفونك، فلاقيته بيقولي مساء الخير وأنا معرفش صوت محمد صلاح أو ي، فلاقيته بيقول لى مساء الخير، انا صاحب حسام تفتكرى مين، فقولت له ميدو فقال لي لا، مين تانى مع حسام في لندن، فانا استغبيت أوي اليوم ده جبت كل الأسماء ما عدا محمد صلاح، فلما زهق مني قال لي أنا محمد صلاح، فقلت لا بتهزر وقعدت اتكلمت معاه شوية كان إنسان لطيف أوي ربنا يخليه لينا وهو فخر لينا كلنا".

أبرز المواقف الكوميدية في طفولة نهال عنبر 

كشفت الفنانة نهال عنبر، عدد من المواقف الكوميدية التي مرت بها خلال في طفولتها، والتي تتضمن حكايات تدل على أنها كانت طفلة "شقية" وذات طباع مختلفة.

قالت:"كنت شقية جدًا وأنا صغيرة وكانت مسافرة، مع والدتي إلى لبنان على مركب وماسكة إيدي وإحنا طالعين، وهي ركزت في الشنط اللى الونش بيرفعها فتركت يدها واختفت عن الأنظار".

وتابعت نهال عنبر: "أمي عندما سمعت صوت محرك المركب اعتقدت أني وقعت في الماء، والمحرك نزلني تحت، وظلوا يبحثوا عني في المركب كلها فوجدونى قاعدة في غرفة القبطان، وقطعت له كل الورق اللي فيها".

واستكملت:" من كتر شقاوتي كان لي واحدة صاحبتي نصف المانية ونصف مصرية وكانت شقية جدًا، وكانت تعبانة وسخنة وماما رفضت تاخدني معاها عند جدتي، فأتت لي دينا صحبتي وقالت لي تعالى معايا نجيب عيش، وروحت معاها ورجعت وجدت ماما في البيت، وضربتنى بالشماعة".

واضافت نهال عنبر أن أحفادها ورثوا عنها هذا الأمر، متابعةً: "أحفادي برضو أشقياء جدًا، ويأتوا بأصحابهم ويعملوا دوشة في البيت".

سبب زواج نجل نهال عنبر مبكرًا
 

قالت الفنانة نهال عنبر، إنها كانت حريصة على زواج ابنها المخرج حسام الحسينى، وهو في سن صغير، في عُمر الـ 22 عامًا.

وأضافت: "زوجت حسام علشان أفرح به وبأولاده، لأن حسام هو ابني الوحيد".

وتابعت: "أنا هتجنن على العزوة.. وأهلى اعترضوا بسبب زواجه وهو في سن صغير، ولكن اصريت على زواجه، وشخصيًا أنا تزوجت وعمري 18 عام، وهذا جعل هناك علاقة أمومة وصداقة بينى وبين حسام، لأن الفرق بينى وبينه مش كبير، وأنا كنت الأب والأم لحسام لأن والده كان على طول الوقت يسافر لظروف عمله، وأنا كنت حنينه جدا وشديدة في نفس الوقت لكن مش قاسيه".

تربية نهال عنبر الصارمة

واستطردت الفنانة نهال عنبر: "خاصمت ابني حسام 60  يوم بسبب رده على في الكلام، كان عاوز يروح ديسكو، وهو في سن شباب، وأنا كنت بخاف من الحاجات دى فقلت له مش هتروح ولو عاوز تروح هروح معاك، فقال لى ازاى أنا كبرت، قولت له مش هتروح فقال لى حرام عليكى بقى، فشاهدنى وأنا بوطى أمسك «سبت الزبالة علشان احدفه فجرى منى، فقلت له أمامك شهرين لا أنا أمك ولا تعرفنى، وأحفادى طالعين شخصيتهم قوية مثلى، وأنا أخدت ده من والدتي لأنها كانت من أصول شركسية، وكل حاجة عندها لها قواعد وبنظام".

علاقة نهال عنبر بأحفادها

اشارت نهال عنبر أن أحفادها  يوسف  وياسين يغيران عليها للغاية، متابعة: "كان فى أحد المعجبين يقول عنى كلام حلو للغاية، فاتعصب أحفادى وكانوا سيتشاجرون معه، فقولت لهم لا داعى للمشكلات وأهدأوا دول معجبين".

واضافت، أنها دائما تفتح حوارًا مع أحفادها كي يعرفون الخطأ والصح وأقول لهم أحكوا لي بصراحة وأنا لن يكون لى رد فعل علشان أقدر اقف بجانبكم، وبتكلم معاهم دايما عن الحرام والحلال، وأشجعهم على الصلاة ياسين يكون الإمام ويوسف يقيم الصلاة ونصلى جماعة احنا الثلاثة.