خطيب نورهان المتهمة بقتل والدتها يعلق على خطابها من السجن: مؤلم وبكيت

علق خطيب نورهان خليل المتهمة بقتل أمها المدعو محمد القطان، علي الخطاب الذي أرسلته لعمتها من داخل السجن، وعلق: خطاب مؤلم وبكيت عندما رأيته.

وأعلن محمد القطان أنه تمسك بشكل أكبر بالدفاع عن خطيبته، وقال: والله لن أتخلي عنها أبدًا طول ما فيا روح، وأضاف: الجواب يؤكد صحة موقفي ويؤكد علي برائتها من قاتل أمها.

وجاءت أهم رسائل نورهان في الخطاب الذي كتبته بخط يدها من داخل السجن، لو بابا تنازل عن الحق المدني هيكون الحكم من 5 لـ 7 سنوات وده كفايه، وقولي لبابا أنا مش فاجرة وحقه يزعل مني لأنه حذرني أنه هيتبري مني لو غلطت تاني وأنا غلطت، وبتحاسب علي حاجة معملتهاش وزعلانة إن أمي ماتت وهي غضبانه عليا، وحسين دمر حياتي هو واهله وما عاتش فاضل لي حاجه أبكي عليها دلوقتي غيرك أنت وبابا وأخواتي، الحكم إعدام لـ ميت، وبفكر في شكل اخواتي وبابا في وسط الناس، وازاي خطيبي بيمشي وسط الناس بعد ما راهن عليا، وساعات كنت بتمني حكم الإعدام واخلص لكن في الأيام الأخيره بقيت ادعي واقول يارب حكم ينزل حتى مؤبد، ونفسي أعيش وأكفر عن ذنوبي، ووالله ما قتلت ماما ولا كنت هقتلها ولو على موتي والله العظيم، وما كنتش أعرف إنه هينفذ الجريمة.

وقالت نورهان في الخطاب، حسين خطط وعرف يوقعني وعرفوا يدمروني بس ورحمة ماما يا شيماء ولو على موتي هاخد حقي وهنتقم منه، ووقت التحقيقات ما كنتش واعيه ولا كنت حاسه ولا حتى بدرجة صغيره وكنت أسكت من صدمتي، ويوم ما حصل اللي حصل يا شوشو أنا كنت متكتفه وكنت خايفه على أحمد أخويا أن ممكن اضيعه، وخوفي علي أخويا خلاني أعمل كده وابقي مدام وما اخافش على نفسي، واخواتي وحشوني جدًا وإن ما بحبش حد قدهم في الدنيا، ونفسي اخرج علشان نرجع لحياتنا تاني وما اتحرمش منكم، وقولي لبابا إن أنا مش فاجرة، وشايله ذنب موت أمي وذنب أبويا واخواتي وانتم وحاجات كثير قوي، وخلي بالك من اخواتي بالله عليك وادعي لي دائما ربنا يغفر لي ويسامحني.

وأضافت في الخطاب، أنا جلستي يوم 18 مش عارفه إيه اللي هيدور فيها بس الكل بيقول اللي رفع القضيه عليا سواء بابا أو حد من أهلي لو تنازلوا عن الحق المدني هاخذ من 5 لـ 7 سنين فيا ريت لو ده ينفع اعمليه ويبقى كفايه كده قوي حرام اشيل حاجه ما عملتهاش وتحاسب دنيا واخره، وما تخليش المحامين يطلعوا حسين وربنا هيحاسبه يوم الحساب، ولو كان لينا عمر وطلعت يبقى في كلام ثاني، وسلمي على محمد خطيبي وحماتي وقالوا لهم ما يزعلوش.

يذكر أن محكمة جنايات بورسعيد كانت قد أحالت أوراق نورهان قاتلة أمها بمساعدة عشيقها لفضيلة مفتي الديار المصرية، وحددت جلسة 18 فبراير للنطق بالحكم، وأودعت محكمة جنايات الأحداث الطفل حسين فهمي إحدي دور الرعاية.

رسائل نورهان من داخل محبسها