السيسي: "بنحاول الأزمات متعصرناش ومقدرش أعمل زي الأوروبيين" (فيديو)
قال الرئيس عبد الفتاح السيسي، إن الدولة واصت جهودها لتوفير مستلزمات الإنتاج رغم الأزمات العالمية.
وأضاف "السيسي" خلال حديثه مع أهالي الدقهلية اليوم الخميس ردًا على سؤال أحد أهاليها عن مستلزمات الإنتاج "أنا قولت من نحو شهر وأكثر ادونا شهرين وهنخلص الموضوع ده".
وتابع "أنا مش هخبى عليكو حاجة أصلها مش بتاعتي دي بتاعتنا كلنا المشكلة إن حجم اللي بنجيبه من بره بالعملة الحرة سواء الدولار واليورو أكبر من حجم اللي إحنا بنصدره أو بنتحصل عليه، كنا قادرين نتعامل مع هذا الموضوع \وفي 2016 عملنا تحرير لسعر الصرف وبقى الدولار ما بين الـ15 والـ16".
واستطرد "خلال الثلاث سنين اللي فاتوا كان منهم سنتين كورونا، وفي السنة الثالثة الحرب الروسية الأوكرانية عاملة مشكلة كبيرة في العالم كله بنحاول نقلل آثاره على كل مصر وكنت بتكلم على المزارعين لما طلبوا نزودلهم الكيماوي شوية".
وأردف "الدولة والمصانع كانت وحدة الغاز بـ3 و4 دولار دلوقتي وحدة الغاز ثمنها 30 و40 ووصلت إلى 60 دولار، الكلام ده إحنا حاولنا بقدر الإمكان ميتنقلش للمصريين، والكهرباء هو كان بيأخذ وحدة الغاز بـ3 دولار أنا مش بخدك في حتة تانية، أنا عايز أفهمك أن القصة على بعضها كبيرة وبنحاول أن هي متعصرناش نتيجة الأحوال، شوف برضو القمح اللي كان بـ 280 و300 بقى أكثر من كده بكتير والزيت كمان".
وأكمل "هذه الأزمة حصلت في العالم وعملت شوية مشاكل أدت أن الأسعار زادت والحكومة تحاول ألا تعكسه للمواطن، أنا عندي لما كان الغاز بـ3 دولار 17 مليون وحدة سكنية بتأخذ الكهرباء بتلت ثمنها، النهاردة بقى بـ40 و50 و60 دولار للوحدة إحنا معملناش ده اللي قدرنا نعمله مقولناش عليه علشان ميبقاش ضاغط عليك".
واستكمل حديثه "لما تكون بتدفع فاتورة كهرباء بـ 100 جنيه وأجي أقولك ادفع 1000 جنيه مين يطيق؟ إنما لما الأسعار زادت بره الأوروبيين حملوا ارتفاع الأسعار للناس وإحنا معملناش كده وأنا مقدرش أعمل كده مع المصريين وربنا يعينا على الخير كلنا".
