خالد سرحان يكشف الستار عن الحالة الصحية للزعيم عادل إمام

كشف الفنان خالد سرحان، عن الحالة الصحية للزعيم عادل إمام، طمأن جمهوره بعد الشائعات التي أُثيرت خلال الساعات الماضية، حول إصابة الزعيم بـ ألزهايمر.

وقال خالد سرحان، في مداخلة هاتفية مع الإعلامي خيري رمضان، في برنامجه حديث القاهرة، المذاع عبر شاشة قناة القاهرة والناس: "أنا شُفت الزعيم قريبًا جدًا، والسوشيال ميديا جننت الناس والتريند ده عمل خلل في الدنيا ومش ممكن كل صفحة عايزة تاخد كم من المشاهدة تطلع أي إشاعة عشان بيكسبوا من ورا ده دي حاجة أنا مش فاهمها سواء ده بيحصل من حد مسؤول أو مش مسؤول".

وأضاف سرحان: "أستاذ عادل كويس جدًا، وهل عقلية كبيرة زي عقلية الزعيم يجيلها زهايمر يعني؟ الراجل بردو مركز وعارف وصحته بخير الحمد لله مفيش أي حاجة خالص وهو  زي الفل، وساعات بيسخر من الصفحات اللي بتقول إن عادل إمام في المستشفى، فالموضوع بيقلب بسخرية لأنه كتر أوي".

واستكمل سرحان: "أنا بطمن الناس على صحة الزعيم هو زي الفل، ومن حق الناس تخاف عليه لأنه في وجدان المصريين كلهم، ولكن رفقًا بالناس كفاية إشاعات هما بني أدمين بردوا وأولاده ممكن يزعلوا وأحفاده لأنهم شايفينه كويس، وكل شوية شائعات بتفّول عليه".

سبب غياب الزعيم عن حفل زفاف ابنة شقيقة

كشف خالد سرحان عن سبب عدم حضور الزعيم حفل زفاف ابنة شقيقه المنتج عصام إمام، قائلًا: "الناس بتسأل ليه الزعيم مرحش فرح بنت أخوه، أنت متخيل إنه ممكن يروح فرح فيه 2000 بني آدم هيتلموا عليه ده ممكن الفرح نفسه يبوظ، مفيش حد يحتمل".

فيلم الواد وأبوه

تحدث خالد سرحان عن فيلم الواد وأبوه، قائلا: "فيلم الواد وأبوه ده المفروض إنه بيجمع بين الزعيم وابنه محمد ومن إخراج رامي، وهما بيحضروا  له وعصام إمام هينتجه، والأستاذ عادل هيرجع إن شاء الله للشاشة، متسمعوش للشائعات السخيفة".

ومن ناحية أخري، قال عاصم إمام شقيق الزعيم في مداخلة هاتفية لبرنامج "ترندنغ" إنه يستعد لتجهيزات الفيلم الجديد من بطولة شقيقه عادل ومحمد إمام، إخراج الابن الأكبر رامي،قال المنتج المصري "سيعمل على فكرة الفيلم بشكل مكثف بعد العيد، ولم يستقر على باقي فريق العمل حتى هذه اللحظة، باستثناء مشاركة محمد إمام البطولة مع الزعيم، وهو من إخراج رامي إمام".