أول رد من عروسة كفر الدور بشأن شائعات طلاقها (فيديو)
حالة من الحزن تعيشها "أمنية طارق" عروسة كفرالدوار بمحافظة البحيرة، التي أصبحت حديث صفحات التواصل الاجتماعي عقب عقد قرانها وسط تجمع عائلي بسيط، حضره أهل الزوج وأهلها، بسبب التعليقات السلبية من قبل رواد مواقع التواصل الاجتماعي.
وقالت "أمنية" أنها قامت بتحضير كلمة لزوجها لتلقيها أمام جميع الحضور في عقد قرانها، وألقتها وهي مرتبكة كونها المرة الأولى لها في الإلقاء أمام الحاضرين، نافية ما تردد من شائعات حول طلاقها، قائلة: أنا مقولتش حاجة حرام ولا ظهرت بلباس خليع، انا استشهدت بكلام الرسول ووصيت زوجي علي أهلي، فأنا وحيدة والديا ومش زعلانه من صاحبتي اللي نشرت الفيديو، دي كانت فرحانه لي والكل كان مبسوط ليا.
وأضافت عروس كفرالدوار، قائله: أهلي قالولي انتي معملتيش حاجة غلط متضايقيش ومتزعليش، وحمايا وحماتي صحابي وبابا قالي انتي مش طالعة بلبس وحش ولا كلام وحش كنت هبقى أول واحد انتقدك، أنا مكنتش بأمره، أنا كنت بطلب منه، ودي كانت أقل حاجة ممكن أقدمها لأهلي.
ووجهت "أمنية" رسالة لزوجها قائلة: مطلع عيني وبحبه وكنت عاملة له مفاجأة، وجزمته على راسي، مشوفتش ولا هشوف زيه، واحنا الاتنين بنحب بعض وواخدين بعض عن حب، والناس القريبة مني عارفين إننا قريبين جدا من بعض، كما تحدثت عن أهل خطيبها، قائلة: مندمتش في يوم من الأيام أن اختارهم كأهلي التانيين، أمه وأبوه محترمين جدا وناس حابني ويحترموني.
وفي سياق متصل، أوضح "طارق" والد عروس كفرالدوار، أن ابنته لم تأمر زوجها بأن يطيع أهلها، وأنه من الطبيعي أن تطلب منه ذلك، ومش عارف ليه تم نشر الفيديو بالطريقة السيئة دي، أحمد شخصية كويسة جدا ومتفاهم وراجل ونحترمه كلنا ومفيش أي حاجه من ناحيته وهما أول ناس وقفوا جنبي".
ووجه والد العروس رسالة لرواد السوشيال ميديا: "اتقوا الله وخليكوا في حالكوا عندكوا كلمة حلوة قولوها معندكوش اتفرجوا واسكتوا، وبلاش الهدم اللي انتوا نازلين فيه بلاش خراب البيوت اللي انتوا بتخربوا وانتوا مش حاسين على السوشيال ميديا".
كان قد انتشر مقطع فيديو عبر صفحات التواصل الاجتماعي، لفتاة يتم عقد قرانها وقبل أن تمضي على العقد طلبت من الحاضرين، أن تلقي كلمة لزوجها قائلةً “أنا واثقة في ربنا وفيك أنك هتكون خير الزوج والسند والصاحب، مندمتش في يوم إني اخترتك، وكنت أعظم وأفضل انتصاراتي في الحياة”.
وأضافت: "زي ما هشيل أهلك في عيني هتشيل أهلي في عينك، الصغير في عيلتي قبل الكبير، ومع إحترامي لكل أهلي، أمي ثم أمي ثم أمي ثم والدي طاروق".
