طلاب مصر في أوكرانيا: "حالتنا النفسية سيئة جدًا والأكل اللى معانا قرب يخلص" (فيديو)

عرضت فضائية “إكسترا نيوز”، اليوم الجمعة، لقطات ترصد دخول القوات الروسية مدينة خاركيف الأوكرانية، وهى ثاني أكبر المدن الأوكرانية، وهى أكبر مركز صناعي وعلمي وثقافي ويعتبرها الأوكرانيون العاصمة الثانية لبلادهم.

وفيما يلي يستعرض “موقع الفجر” تصريحات بعض الطلاب المصريين المقيمين في أوكرانيا:
قال أحمد، طالب مصري بكلية الهندسة في جامعة خاركوف بأوكرانيا، إن الوضع سيئ جدًا منذ بدء الغزو الروسي وقصف أوكرانيا ويزداد سوءًا، مشيرًا أن الطلاب لم يناموا ليلية أمس بسبب شدة الخوف.
وتابع الطالب في تصريحه لـ "بوابة الفجر": "المدينة اللى أنا فيها بس فيها نحو من 25 لـ30 طالبا مصريا، وجامعة خاركوف بس تمتلك ما يزيد عن ١٠ مناطق سكنية للطلاب المصريين".
وأضاف: "كلنا حالتنا النفسية سيئة جدًا وحاسين بالعجز مش قادرين نعمل حاجة وملناش غير ربنا، السفارة المصرية هنا طلبت مننا نروح بولندا ونسافر من هناك بفيزا لمدة ١٥ يوما، المشكلة عشان نسافر بولندا لازم نروح ألبير بمسافة حوالى ١٧ ساعة بالقطر وكل الطرق كانت زحمة إمبارح معرفناش نخرج والطرق مش أمينة ولا في وسيلة تنقلنا مكان تانى، إحنا محاصرين في مكاننا ومش عارفين نخرج، وجميع الطرق اللى كانت بتوصل لكييف تم تفجيرها لمنع مرور الدبابات الروسية منها".

وأكد الطالب المصري: "الناس كلها نفسيتها وحشة خصوصًا بعد تكرار القصف عدة مرات على عكس توقعاتنا، صحينا إمبارح الساعة ٥ الصبح على أصوات القصف رغم إن المباني هنا معزولة بس الأصوات كانت شديدة والمباني بتتهز".
وأشار: " لما القصف زاد نزلنا كلنا في خنادق تحت البيوت نستخبي فيها لأنها أكثر أمانًا، لغاية دلوقتى كلنا بخير ومعانا طلاب عرب وأجانب وأكرانيين بس المشكلة إن الأكل إلى معانا يكفي لكام يوم بس ومش عارفين بعدها هنعمل ايه".
وأوضح: "عدد الطلاب المصريين هنا أكثر من ٥٠٠٠ طالب مصري فقط بنات وشباب وأغلبنا مش عارف يخرج من مكانه".
من جانبه، قال أحمد إبراهيم، طالب بالفرقة الرابعة بكلية الهندسة جامعة بولتافا، إن القوات الروسية قامت بتفجير مطار بولتافا أمس، ولكن الضرب توقف اليوم وجميعنا بسلام.
وأضاف إبراهيم في تصريحاته لـ "بوابة الفجر"" الوضع سيئ جدًا في مدينة خاركوف، وفي ٥ من أصدقائى كانوا هناك وبصعوبة وصلوا بيتي النهاردة وقاعدين معايا في أمان لأن مفيش قصف مدنيين، أنا لسه ساحب فلوس من حسابي بس أقصي حاجة ممكن أسحبها ١٠٠٠ جنيه فقط، المكان اللى إحنا فيه أمان، مش عارفين نروح الحدود البولندية لعدم وجود مواصلات والطريق مش آمن بس السفارة وعدتنا تأمنه".
وتابع: " كل الشباب والبنات إللى معانا مرعوبين جدًا، وعددنا كلنا أكتر من ٧٠ شخصا، نائب رئيس الجالية المصرية كابتن أحمد موجود معانا في بولتافا ويتواصل معانا باستمرار ويساعد كل العرب الموجودين هنا".