مؤسس "أمهات مصر" توضح كيفية التغلب على التوتر والقلق أثناء الامتحانات
تعيش الأسر المصرية أجواء امتحانات نصف العام وسط حالة من الضغط والتوتر، خاصة أولياء أمور طلاب الصف الرابع الابتدائي، الذي يؤدون الامتحانات غدا السبت، في أول امتحانات لهم في نظام التعليم الجديد الذي يطبق عليهم أول مرة هذا العام.
وفي هذا السياق، أجابت عبير أحمد، مؤسس اتحاد أمهات مصر للنهوض بالتعليم، وائتلاف أولياء أمور المدارس الخاصة، عن سؤال لأولياء الأمور، تضمن: "بما إننا في فترة امتحانات.. إزاي نقدر نتغلب على الخوف والفزع من الامتحانات.. فين الأمهات الشطار يفيدونا؟".
وتفاعل أولياء الأمور من الأمهات على صفحة اتحاد أمهات مصر للنهوض بالتعليم، في الفيسبوك، حيث قالت ولية أمر: "التوتر والقلق والخوف أكيد هما المسيطرين على الأجواء وده الطبيعي، لكن بنحاول بقدر الإمكان منوصلش الإحساس ده لأولادنا ونعطيهم الثقه بنفسهم، خاصة وإننا عاملين اللي علينا والباقي علي الله، إن الله لا يضيع أجر من أحسن عملا".
وأضافت ولية أمر: "والله بنحاول نشجعهم ونتكلم معاهم انهم يعملوا اللى عليهم والباقى على ربنا، وبنحاول نساعدهم على قد مانقدر نذاكر شوية ونقعد مع بعض شوية، نتكلم بعيد عن المذاكرة بفصلهم شوية من المود واعملهم عصير أو نسكويك دافئ، وبيرجعوا يكملوا مذاكرة تانى وربنا معانا جميعا إن شاء الله".
وذكرت ولية أمر: "عادة أنا شخصيا بكون متوترة وقلقانة جدا، لكن بحاول أبسط الأمور وأننا لما نعمل اللي علينا ونذاكر بكل طاقة وجهد والأهم بتركيز هنوصل لنتيجة مرضية والباقي علي ربنا، إنما الأهم دورنا بالمذاكرة أول بأول ومهما كانت الدنيا صعبة نبسط الأمور ونهدي نفسيتهم للوصول لأفضل النتائج
وربنا مع أولادنا جميعا".
"رابعة ابتدائي والثانوي بجد ربنا معاهم، بحاول إني أقلل التوتر بس غصب عني متوترة ومش عارفه أداري ده،
فياربي بحق تعبنا وتعبهم تجعله صلاح وخير وفلاح وتفوق إن شاء الله"، تضيف ولية أمر أخرى: "نعلمهم السعى والإجتهاد ونسيب النتيجة على ربنا، ونعلمهم نرضى بالنتيجة مدام عملنا اللى علينا ومش لازم نقفلهم على الدرجة والدرجتين، مفيش داعى نستنزف مجهودهم وطاقتهم من وهم صغيرين".
