Advertisements

طليقتي فتحت عليا باب جهنم

بوابة الفجر

السلام عليكم 
اخبارك ايه استاذة نفين حجازى  يارب تكونى بخير وسعاده وربنا يبعد عنك اى مكروه وسؤ 

 انا كنت بعتلك من فترة كبيره ان انا كانت حصل مشاكل بينى وبين مراتى وطلقتها  ودخلت ناس كتير عشان ترجع وهى رفضت  عاوزه تعمل لنفسها كرامه  المهم انتى قولتيلى حاول ولا تيأس ولو لك نصيب هترجع لكن الحمد لله وبحمد ربنا وبشكره انها رفضت ومرجعتش عشان لو كانت رجعت كانت الحياه هتفضل على نفس الوتيره 
انا ربنا كرمنى ولقيت انسانه كويسه واتجوزنا وربنا كرمنا الحمد لله وانعم علينا  وخلفنا والحمد لله عايشين فى سعاده وهدوء فوق الخيال  وفعلا لقيت انسانه عوضتنى عن كل  حاجه اتحرمت منها 
فعلا انا مكنتش عايش  ولا شوفت راحة بال قبل كده 
بس المشكله ان طليقتي واهلها مش سايبنى فى حالى بيبعتولى رسايل على ماسنجر من حسابات وهميه  ويقولوا ان احنا شوفنا مراتك وهى عند اهلها بتلف فى البيوت وبتروح اماكن وحشه وبتمشى مع ده وده 
ولكن طبعا انا عارف ان ده كلام فارغ انا عندى ثقه فى زوجتى  وانا عارف شخصيتها شكلها ايه وهى تعرف ربنا وعمرها ما عملت حاجه غلط ولا بتخبى عليا حاجه  وطبعا بيبعتولها رسايل نفس النظام  كل همهم  انهم يخربوا عليا حياتى   انا بتجاهل الرسايل دى كتير وهى نفس النظام  والمشكله مش عارف اوصل للى بيبعتها  لكن برضوا احنا بشر والعيار اللى ما يصيبش بيدوش .. 
المهم مش عاوز اطول عليكى  انا بطلت اتعامل مع الفيس بوك وزوجتى كمان وقفلناه خالص عشان نعيش مرتاحين 
صراحه مفيش حاجه حلوه ولا خير جه من السوشال ميديا ولا الانترنت 
االحمد لله لو كانت الحاجات دى بتحصل معايا من 3 او 4 سنوات فاتت كنت عملت مشاكل كتير 
شكرا استاذه نيفين واتمنى تكونى بخير

فضفضة
محررة الصفحة .. نيفين حجازي

لقد سعدت كثيرا باخبارك السعيدة وارجو الله ان يديم عليك وزوجتك السعادة وراحة البال ، لي رأي في وصفك لجملة ( العيار اللي ما يصبش يدوش ) انا لا اوافقك الرأي .. لا داع من الاساس ان يكون داخلك ذرة شك تجاه زوجتك وطالما وصفت شعورك بهذا التعبير اذن هناك احتمال ان مضايقات طليقتك ربما في يوم تحدث شيء ما بينك وبين زوجتك لا قدر الله.. اذا اقول لك دع الشك تماما ولا تفكر فيما سبق من حياتك الماضية صحيح انك اغلقت حسابك على الفيس بوك لكني شعرت من لهجتك انك مازلت خائف من لحظة ما ربما يحدث فيها اشكال بينك وبين زوجتك يعكر عليكما صفو الحياة ، خوفك الزائد من هذا في حد ذاته خطر .. كل ما عليك ان تطوي صفحة ما مضى بشكل حقيقي، اشغل حياتك بتفاصيلك الجديدة مع زوجتك التي تشعر معها بالراحة والأمان ولا تنتبه لأي تصرف يعرقل مسيرتك للامام حتى وان حدثت مرة اخرى ، لا تعطي للموقف اكبر من حجمه .. واستمتع بما انعم الله عليك به ولعلهم مع مرور الوقت يبتعدون ويلتهون في شؤونهم .