"مش أول مرة".. 4 مفاجآت في تحقيقات واقعة "اسجد للكلب"

كشفت الساعات الأخيرة، عن عدة مفاجآت في الواقعة المعروفة إعلاميا بـ"اسجد للكلب"، التي أشعلت السوشيال ميديا، خلال الأيام الأخيرة، إلا أن أقوال أطراف القضية شهدت مفاجآت للرأي العام.

وعلى خلفية التحقيق مع الدكتور عمرو خيري، رئيس أقسام العظام بكلية الطب جامعة عين شمس، وطبيب آخر ومساعد لهما، لاتهامهم بالتنمر ضد عادل سالم، الممرض، والإشارة إليه والتعدي عليه بالضرب وإجباره على السجود لكلب، والتشهير به على شبكة الإنترنت، اعترف الطبيب عمرو خيري بتفاصيل جديدة.

"مش أول مرة"
وقال: عندى ممرض أسمه "عادل" بيشتغل معايا بقاله أكثر من 23 سنة، وبحكم العشرة اللى ما بينا أخدنا على بعض، وبقيت بعامله زى صديق، وأتعودنا ن بعد يوم العمل الشاق نهزر ونمزح مع بعض وناكل مع بعض، ونصلى مع بعض وهو كان بيجيلى البيت أحياناَ، وفى مرة شاف الكلب بتاعى وقعد يلعب معاه، ولما الكلب بتاعى مات أنا حزنت عليه جداَ، ولما "عادل" شافنى حزين قالى أنت حزين ليه؟ رديت وقولتله عشان الكلب مات، وابتدى يهزر معايا ويمزح على حزنى على الكلب.

وتابع: "وفى مرة كان هو عندى فى المكتب و"عادل" قعد يهزر معايا ويقولى أنت لسه حزين على الكلب، وكان موجود فى العيادة السكرتير اسمه "عمرو رفعت"، والدكتور "مسعد جمال الدين"، وقاعدنا نهزر مع "عادل" وخليناه يلعب رياضة ودى مش أول مرة وأنا كنت بصورة فيديو وهو بيلعب رياضة، وبعد كده فوجئت أن الفيديو ده اتنشر على مواقع التواصل الاجتماعى، والناس قعدت تهاجمنى بعد انتشار الفيديو ده، وبسببه اتقبض عليا النهاردة الفجر وجيت على النيابة، ودا كل اللى حصل.

الكلب بـ 20 ألف جنيه
وفي أقواله أمام النيابة، قال الممرض عادل: "لاقيت الدكتور عمرو حزين بصورة مبالغ فيها فسألته وعرفت منه إنه كان بيربي كلب والكلب ده توفي، وإنه اشترى واحد جديد بنحو 20 ألف جنيه، فأنا أخدت منه الكلام وكنت بدردش مع دكتور معايا في المستشفى اسمه معتز على قبيل الدعابة".

سبب طلب سجوده للكلب
وتابع: "قلت إن المبلغ ده كبير على كلب مايستهلش، وإن الإنسان أولى بالفلوس ديه، وأنا لو أخدته البلد عندي القلج ودي القرية اللي أنا منها الكلاب اللي بتقف على الترعة هتقطعه، ومكنتش أعرف إن الكلام ده هيوصل لدكتور عمرو وهيزعله، وفي اليوم اللي اتصور فيه الفيديو بعد ما الحالات خلصت دخل الدكتور معتز لدكتور عمرو وقفلوا عليهم، وكان معاهم السكرتير عمرو رفعت".

واستطرد: "بعدها لقيت الدكتور معتز بينده عليا وبيقولي كلم دكتور عمرو، فدخلت أشوف فيه إيه لقيت الدكتور معتز قفل الباب عليا من جوا وفضل واقف على الباب، وابتدى الدكتور عمرو يعاتبني على الكلام اللي وصله، وبيطلب مني الأفعال اللي ظهرت في الفيديو".

5 اتهامات تطارد المتهمين
وقال أحد أعضاء فريق الدفاع عن الممرض إن المتهمين يواجهون 5 اتهامات، وهي ازدراء الدين، والتنمر، وإهانة قيم المجتمع، واستخدام القوة، واستخدام عصا وهي أداة لإرهابه.