طالب ثانوي يحصل على صفر باللغة العربية.. و"التعليم": سيتم التحقيق (تفاصيل)
وجه يوسف محسن، طالب في الصف الثالث الثانوي، والذي حصل على مجموع صفر في اللغة العربية بامتحانات الثانوية رغم حصوله على مجموع جيد في باقي المواد استغاثة عاجلة لوزير التربية والتعليم والتعليم الفني.
وقال الطالب في استغاثته التي نشرها على صفحته علي الفيس بوك ولاقت تداولا كبيرًا من رواد السوشيال ميديا: "أنا اسمي يوسف محسن من مدرسة جمال عبد الناصر، غرب الفيوم جبت 64 % وجبت في العربي صفر وحصل معايا إني كنت مسلم ورقتين للبابل شيت وعامل محضر بده زي ما المدرس قالي، أنا قولت للمراقبة أنا غلطت في سؤال أعمل إيه إدتني بابل شيت قالتلي حل فيه السؤال ده بس وهندبس الاتنين في بعض ومعاهم المحضر".
وأضاف :" والمحضر مكنش بتبديل بابل شيت لا، أنا كنت كاتب إن عندي سؤالين غلط وتم نقلهم في بابل شيت آخر على حسب تعليمات المدرس بالكلام اللي هكتبه، وأنا معرفش إزاي أكتب محضر، أنا كتبت اللي قاله.. ولما سألت دلوقتي كذا مدرس قالوا بيروح ورقة واحدة والتانية بتتبعت كـ تالف، ومدرسين قالوا بتتقطع بس، وده مش اللي مضيت عليه ولا كتبته في المحضر.. المحضر اتعمل ومضيت على أساس اللي المستر بتاع اللجنة قالي عليه واللي أنا كاتبه بإيدي في المحضر".
وتابع الطالب:" وكتبت المحضر إني نقلت إجابة السؤال ده في بابل شيت تاني ومضيت عليه والمراقب كنت قولتله طيب ينفع يبقى ليا اتنين قالي طالما معمول محضر إثبات حالة خلاص.. وكان في أخر الوقت وقالي يلا عشان الوقت خلص، وأنا كنت أول مرة في حياتي أمتحن بابل شيت ولسه معرفش أي حاجة، فـ مشيت ورا كلام المدرس اللي هو أكيد فاهم أكثر مني، ودلوقتي لقيت إني جايب صفر.. فمعنى كده إن الورقة اللي هي فيها سؤال واحد اللي راحت واتصححت ومع العلم المدرس قالي هيروح الاتنين طالما عملت محضر".
واختتم الطالب:" فهل ذنبي إني مشيت ورا كلام المراقب اللي أصلا مخلنيش أنقل غير سؤالين بس، ولو سابني أنا كنت هنقل كله بس المراقب والمراقبة كانوا واقفين جنبي عايزين يلموا الورقة وخلاص" بحسب زعم الطالب.
وقالت مصادر بديوان عام وزارة التربية والتعليم والتعليم الفني إن الوزارة تتابع ما نشر على مواقع السوشيال ميديا وسيتم التحقيق فيما قاله الطالب وإذا كان له حق سوف يحصل عليه .
