مؤسس "أمهات مصر": مطالبات بتسهيل إجراءات التحويل بين المدارس
قالت عبير أحمد، مؤسس اتحاد أمهات مصر للنهوض بالتعليم وائتلاف أولياء أمور المدارس الخاصة، إنها تلقت شكوى على الإتحاد من بعض أولياء الأمور يطالبون فيها بتسهيل إجراءات تحويل الطلاب من مدرسة لمدرسة أخرى.
وتضمنت الشكوي رسالة لوزير التربية والتعليم، جاء فيها:
"نرجو النظر في طريقة تحويل الطلاب بين المدارس، وكم الإجراءات الطويلة المطلوبة من ولي الأمر أنه يقدمها، أوراق وامضاءات ودمغات واستمارات وموافقات، وكل حاجه منهم محتاجه يوم لوحدها ومن أماكن مختلفة.
يعني اللي بيتجاب من البريد وساعات مش بيكون مش متوفر ويتجاب بفلوس أغلى من مكتبات، واللي بيتمضي من المدرسة المنقول منها واللي منقول اليها ومن الإدارتين وأكثر من زيارة لنفس المكان، مهو حضرتك عارف موظفين الحكومة.. أصل مدام مش عارف ايه مش موجودة.. أصل الختم مع حد تاني.. أصل المدير مشي وهكذا.
ولي الأمر ده إنسان بيشتغل وعنده التزامات وحتى لو الأم هي اللي بتقضي الإجراءات دي فدي بهدلة والله وخصوصا لو التحويل من محافظة لمحافظة تانية والموضوع بيكون أكثر صعوبة لو عندك اولاد في مدارس مختلفة مش مع بعض.
نتمنى تسهيل الإجراءات عن كده ومراعاة أننا مواطنين نستحق التقدير عن كدة.
ممكن نستفيد من خبرات دول تانية في الموضوع ده أو نشغل ناس في الحكومة هي اللي تؤدي المهام دي داخليا أو يكون التحويل إلكتروني فقط وندفع حتى رسوم مادية، مهو كده كده بندفعها في صورة مواصلات أو بنزين".
