لهذه الأسباب.. أمهات مصر يطالبن بإلغاء المواد غير المضافة للمجموع
قالت عبير أحمد، مؤسس اتحاد أمهات مصر للنهوض بالتعليم، وائتلاف أولياء أمور المدارس الخاصة: "يمكن الناس اللي مش عندهم ولاد في التعليم ميعرفوش ليه أولياء الأمور بيطالبوا بإلغاء المواد غير المضافة أو حلها في بوكيلت من المنزل".
وأضافت عبير، في بوست نشرته علي صفحة اتحاد أمهات مصر للنهوض بالتعليم، في "الفيس بوك"، موجهة حديثها للأمهات: "يا ريت تقولوا ليه إحنا بنطالب بالمطلب ده علشان يعرفوا؟"، الأمر الذي تفاعل معه مئات الأمهات في تعليقات على المنشور.
وقالت ولي أمر: "لأن مفيش وقت والوقت ضيق جدا والمدرسين في الدروس بيشتغلوا أحيانا درسين مع بعض علشان يلحقوا يخلصوا المنهج، هنعمل إيه اكتر من كدا، الرحمة وتخفيف المنهج ده حق في الظروف دي، غير إن المنهج الأساسي طويل بشكل مبالغ فيه وكله على دماغنا وإحنا اللي شايلين الهم، ناقص يمتحنا إحنا هيلاقينا حفظنا المنهج أكتر من ولادنا".
وأضافت ولي أمر: "لأن مفيش ورق ولا ملزمة ولا شرح ولا كتاب، طبعا مرهقة أن تاخد فيها درس هي كمان لأن لازم ينجحوا فيها، وكمان الامتحان ورقة كاملة وشاملة وتيرمين مع بعض، وكل مادة في يوم، ومش ملاحقين تذاكر المواد الأساسية اللي هي أصلا مناهج طويلة بتخلص بصعوبة وكمان الامتحان بعد العيد وشهر رمضان نص اليوم ضايع، كل دي أسباب".
وأوضحت ولي أمر أخرى: "عشان مفيش مدارس ولا ليها منصات خاصة بيها، ده غير أنه نمتحن المادة كاملة بتاعة السنة كلها أخر السنة مع امتحان المواد المجمع طب ده يرضى ربنا، الأطفال هتستوعب ٥ مواد، وكمان منهج دين كامل، وكمان إنجليزي مستوى، وكمبيوتر وفرنساوي، كل ده مع بعض إزاي يعني".
وأضافت ولي أمر: "الترمين مع بعض كتير جدا، حرام المستوي عند بنتي تانية إعدادى ٤ استوري وشعر وجرامر وكلمات من أصعب ما تتخيلوا، ده غير الألماني والدين والكمبيوتر، وبعدين المواد الأساسية، ليه دول نقل مش هيتنقلوا أولى طب بشري".
