الحظر خرب حياتي الزوجية

فضفضة

صورة أرشيفية
صورة أرشيفية


السلام عليكم استاذة نيفين لعلك بخير.. من ساعة ما الحظر بدآ وجوزي قعد في البيت بدآت المصايب .. انا باعته مشكلتي لاني متآكدة ان فيه زيي من الزوجات كتير جدا .. المهم .. انا متجوزة من ١١ سنة يعني المفروض اكون حفظت جوزي .. لكن من الواضح ان الشغل بيلم بلاوي كتير وبيمنعنامن معرفة اقرب الناس لينا لان الزوج معظم الوقت في الشغل بيرجع تعبان قليل الكلام بحكم الارهاق فبيبقي مفيش مجال للمناكفة والرغي والتدخل فيما لا يعنيه زي التدقيق في كل تفصيله .. انا بتخانق معاه كتير وحياتنا بقت شبه جهنم الحمرا ..

والعيال قرفوا كمان من وجودي وبيسآلوني يا ماما هوة بابا ماله بقي عامل كدة ليه هوة اصلا شرير وكنتي مخبية علينا ولا ايه؟ طيب والنبي اقول للاولاد ايه !! جوزي النهاردة من كتر زهقه من الحبسة بقي يقولي هوة انتي ناشرة الغسيل كدة ليه اه عشان كدة الهدوم بتطلع مبهدلة .. دة حاجة .. تاني حاجة .. انتي سايبة السخان والع طول النهار ليه .. تالت حاجة .. ليه مش عاملة مكان مخصوص لشباشب البيت ومكان تاني لاحذية الخروج .. رابعا .. هوة انتي ليه مش بتشغلي مروحة الشفط لما بتقلي البطاطس .. يا سيدي بفتحها انت اللي ما اخدتش بالك .. وهكذا مش عايزة اقولكم قد ايه اتخنقت منه دة غير بقي ما يتعلق بعلاقتنا الخاصة غالبا بتقلب غم والليلة بتبوظ واطلع انا كمان اتخانق مع الاولاد واليوم يقلب كله مآساة والله هم يبي وهم يضحق .. هموت من الغيظ مش قادرة .. دة في ايام فاتت علينا الخناق وصل الي حد طلب الطلاق .. فعلا قعاد الراجل في البيت كارثة بكل المقاييس وانا متآكدة ان كل الستات نفس الوضع واكتر وبتمني ان كل ست هتقرآ رسالتي تشاركنا بقصتها ونحاول نشوف حلول عشان بيوتنا هتتخرب لو الحظر طول عن كدة .. شكرا استاذة نيفين وارجو نشر رسالتي بدون اسم لمنع الحرج وياريت كل قارءة تبعت لفضفضة للمشاركة .. شكرا والي لقاء 

فضفضة
محررة الصفحة .. نيفين حجازي