"شايفك بتدبحي قدامي".. تعليق ناري من طليق المطربة إيناس عزالدين

قام أحمد قمر طليق المطربة إيناس عز الدين بمساندتها بعد أزمتها الأخيرة التي واجهتها بعد ظنها إصابتها بفيروس كورونا، واتهام البعض لها بأنها اثارت الجدل بهدف الشهرة ، وذلك من خلال حسابه الشخصي على موقع التواصل الاجتماعي"فيسبوك".

كتب أحمد قمر منشورًا قال فيها:"اعذريني يا إيناس مش هقدر أحافظ على كلمتي معاكي لحين التحقيق في الأمر بشكل قانوني وأفضل ساكت وشايف ظلم كبير واقع عليكي وتجاوزات في حقك أنا لا يمكن اقبلها على إنسانة عاشت في بيتي سنين ومش قادر حتى استنى لحد ما اتمالك أعصابي من اللي حاصل معاكي وأقدر أطلع لايف أتكلم وهكتب البوست ده أولًا".

وتابع أحمد قمر قائلًا:"هرد على جزئية شايف إيناس بتتدبح قدامي فيها،هل النقابة حققت مع ايناس قبل ما يتقال إنه هيتم شطبها بشكل نهائي من النقابة،هو انتوا بتحاسبوا الناس قبل ما تحققوا معاهم ولا بقى التحقيق دلوقتي عن طريق السوشيال ميديا، وإنها لازم تطلع تتكلم في السوشيال ميديا وتبرر مش فيه إجرائات قانونية لازم تتبع ويتم استدعائها للتحقيق،وهل يا ترى إتحاد الكرة حقق مع محمد مجدي لاعب الإسماعيلي اللي دخل المستشفى بنفس السبب وهو كان معاها على نفس الطيارة اللي راجعة من المغرب وقاعد في نفس المحيط بتاعها، ونزل صورته على إنه كورونا برضو لإنه جتله نفس الأعراض خاصةً إن فعلًا كان معاهم مصاب وحالته إيجابية في الطيارة واتأكدوا من ده لما رجعوا مصر، هل صدفة هي ومحمد مجدي اللي على نفس الطيارة وفي نفس المحيط يحصل معاهم نفس الشيء".

وأضاف أحمد قمر قائلًا :"طيب بتقولوا إنها بتكتب كل شوية وتدعي إنها مريضة علشان تعمل شو، وأنا النقطة دي أنا بقى اللي لازم أرد عليها لإنها كانت في بيتي، إيناس من قبل جوازي منها وهي كل شوية تقع من أهلها وتروح مستشفيات من صغرها ومناعتها سيئة وأقل حاجة بتصيبها، إيناس دخلت بيتي ومن أول شهر حصل حمل و كان في توأم فرحتي و فرحة أهلي وأهلها كانت ما تتوصفش ولا تتقدر بثمن لحد ما وصلت للشهر الرابع وحست بتعب ومش عارفة فيها إيه، روحنا كشفنا وعملنا سونار في مستشفى المركز الطبي في إسكندرية ولقينا إن الأجنة ميتين والنبض متوقف وإن حالتها خطر وهتدخل في تسمم حمل والدكتورة ادتها حبوب تحت اللسان علشان تجهضها من غير ما توسع الرحم و فضلت ٢١ يوم قدامي بتتعذب لحد ما اجهضت ومسكت ولادي اللي لم يكتمل نموهم وكانوا حتة لحم ميتين بين ايديا قولت عمرهم وهي كانت بتموت قدامي وعمري ما انسى شكلها وهي ماسكة لحمها وبتبكي إنه مات، حتى لما دخلت أراب ايدول حصلها مشكلة و نزيف في الأحبال الصوتية والقناة نفسها اللي اعلنت الكلام ده، وإنها ممنوعة من الغناء ٢١ يوم ومن الكلام ٤ أيام و وقتها غنت وهي تعبانة هل هتكذبوا كان مذيعة وإدارة قناة mbc اللي قالوا كده بعد منظار حنجرة ليها هما كمان كدابين".

واستكمل أحمد قمر قائلًا:"المهم اللي يعرف إيناس عارف قد إيه هي بتاخد كل حاجة على أعصابها بشكل شديد جدًا، وده كان بيأثر جامد على القولون لحد ظهرت معاها مشاكل المعدة والقولون واللي اتشخصت اكتر من مرة غلط واخدت أدوية كتير غلط بوظت هرموناتها لحد ما زادت سوء وكنت بشوفها وهي بترجع دم قدامي و بتنزف من فتحة الشرج دم بالأيام وأنا وخالها وأمها كنا نحتاس بيها وهي غرقانة دم في إيدينا انا اللي كنت بشيلها على كتفي وأنا اللي كنت بمسح دمها وأنا اللي كنت بشوفها وهي بتعاني كل شوية وتتشخص غلط وحملت في خلال المدة دي مرتين مرة الحمل نزل لوحده و مرة حالتها كانت حرجة و كانت هتدخل مننا في غيبوبة لإن أعراض الحمل كانت بتقلب معاها بنزيف من الشرج من القولون و ترجيع دم وقطع نهائي للأكل، وأنا وخالها احتاسنا بيها في المستشفيات اللي كلهم اجمعوا إن الجنين لازم ينزل لإنها مش هتتحمل لحد الولادة والكلام ده كله حصل في مستشفى القوات المسلحة في إسكندرية،وبجواب من النقابة دخلت المستشفى وكانت حامل في الشهر التاني واخذنا وقتها تقرير من دكتور جهاز هضمي و دكتور تاني جراح وبناءً على التقارير دي تم اجهاضها وكأنها بتتحرم غصب عنها من الأمومة في عز شبابها رغم إنها ما عندهاش مشاكل في الحمل نفسه لكن مشاكلها كلها في القولون وتمنع استمرار الحمل".


كما قال :"لحد ما اتعمل مناظير معدة و قولون وتم التشخيص إن عندها فتاء في المعدة و ورم في القولون و اخدوا منه عينة وهي وقتها قالت إن عندها ورم ومستنية تعرف خبيث ولا حميد لحد ما ربنا من رحمته بيها طلع مجموعة التهابات شديدة على مدار سنوات اتجمعت على بعض وعملت كتلة كبيرة حميدة في القولون وكل يوم في المستشفى واغلب دخولها المستشفى والمناظير والتحاليل والأشعة اللي كانت بتعملها كانت بتكون من جوابات رسمية من النقابة بتاعتها ويقدروا يراجعوا الإيصالات بتاعة تحويلها لمستشفى القوات المسلحة و معمل ألفا ومعمل البرج وغيره وغيره وطبعًا الإيصالات دي بتتحول للحسابات لإنها عضو عامل في النقابة فأي إيصال بيطلع بتروح بيه المستشفى هي بتدفع ٢٥٪؜ من قيمة دخولها وعلاجها وحجزها أو تحاليلها وأشعتها ومناظيرها والنقابة بتدفع ٧٥٪؜ فأكيد كل الايصالات والحسابات دي موجودة بالنقابة".

وأنهى كلامه قائلًا:"أنا آسف يا إيناس وعارف وضع حالتك دلوقتي شكله إيه وقد إيه انتي لسه تعبانة وحالتك زي الزفت ومش متحملة بس مش هقدر اشوفك بيتقطع فيكي واسكت وأنا جنبك ومعاكي اناث وأهلك لإننا حضرنا وشيلنا تعبك ومرضك سنين على كتافنا وهنفضل جنبك لحد ما يتم التحقيق رسمي وتقولي كل اللي عندك بشكل قانوني لإن الكلام مافيش اسهل منه لكن اثبات الحقيقة هو ده اللي لازم يتعمل بالقانون،وربنا يعينك على اللي انتي فيه دلوقتي وعلى وضعك الصحي اللي زي الزفت ويعين كل إنسان سبك وخاض فيكي، وفي عرضك وفي أهلك الطيبين المحترمين على نفسه لإنهم شياطين مش بشر وكل اللي كانوا بيمثلوا إنهم إصحابك وبيحبوكي وطول الوقت جنبك ومعادنهم بانت في شدتك ولما وقعتي كله سن السكاكين ودبح فيكي، وتتساقط الاقنعة".