بين الخيال والواقع .. حواديت مرعبة

مساء الخير استاذة نيفين ارجوكي احتاج المساعدة في امر شديد الخطورة .. انا عندي ٣٦ سنه غير متزوجة ولم يسبق لي الزواج واعتقد ان السبب في دة تصرفاتي وسلوكي اللي كل اللي حوالية بينبهوني منه لكن الغريب ان ساعة حدوثة انا زي مايكون مش في كامل ادراكي باللي بقوله او اعمله .. والدتي بقت تتكسف تخرج معايا او اروح معاها زيارات لان كل اللي بيقابلني يفضل يقولها انتي بنتك مجنونة والكلمة دي اتعقدت منها لدرجة اني فكرت في الانتحار كذا مرة وامي لحقتني علي اخر لحظة بستر ربنا والمصيبة انا فعلا مش ببقي فاكرة اللي همة بيقولولي اني اتكلمت فيه دة بخلاف تصرفات تانية كتير .. المهم اني دلوقتي انا حاسة اني وحيدة جدا وبقيت لا قادرة اخرج مع امي عشان بحرجها قدام الناس ولا قادرة علي احساس ان امي محبوسة في البيت معايا معظم الوقت احسن اعمل مصيبة .. هية ملهاش ذنب .. وامي الفترة الاخيرة بقت تبخرني كتير وتقرآ لي قرآن كتير ومفيش فايدة وساعات ياعيني بلاحظ انها بتقعد تعيط لواحدها كتير واكيد دة بسببي لاني الابنة الوحيدة ليها بعد طول غياب حمل ليها في اول زواجها زي ما حكتلي .. ووالدي مفروم في شغله لانه صاحب شركة وكل ما امي تستنجد بيه يقولها طيب انا هسيب شغلي واقعد احل مشكلة بنتك ؟ اكيد عندها شوية كآبة من القاعدة في البيت خصوصا اني كمان مش بشتغل .. او يقول لها يمكن عندها عقدة انها اتآخرت في الجواز .. طبعا الكلام دة مش بيحصل قدامي لكن صوته بيبقي عالي وبسمعه غصب عني وبصراحة كلامه كمان نبهني لنقطة عدم جوازي وابتدت مع باقي المشاكل يزيد عليهم عقدة عدم الزواج .. انا بجد اتخنقت ونفسي اموت احسن عشان اريح اهلي خصوصا امي المسكينة ملهاش اي ذنب في اللي بيصدر مني .. من فضلك استاذة نيفين والسادة القراء لبابك فضفضة كلكم تبلغوني بالحل انا محتاجة مساعدة فعلا .. اشكركم جميعا .. معلش مش هقدر اكتب اسمي