الأنبا رافائيل عن مطالب توحيد الأعياد: "اشمعنى إحنا اللي عاوزين نذوب في الغرب"
علق الأنبا رافائيل، الأسقف العام لكنائس وسط القاهرة للأقباط الأرثوذكس، على مطالب بعض الأقباط في المهجر بتوحيد الأعياد مع الأجانب، قائلاُ: كل الأجناس بتفتخر بهويتها، اشمعنى إحنا اللي عاوزين نذوب في الغرب؟!.
وأكد أن توحيد الأعياد مطروح أمام المجمع المقدس للدراسة، مضيفًا "لكن انا شخصيًا مبحبش كده - جايز تزعلوا مني يعني لأن انتم جايز تحبوا أو تحسوا بأحتياجكم بتوحيد الأعياد - لكن أنا في ضميري اللي إستلمناه لازم نسلمه زي ما هو مانغيرش فيه".
وأضاف "روفائيل"، في تصريحات صحفية له، أن التقويم القبطي للكنيسة القبطية دقيقة جدًا، لافتا إلى أن عيد القيامة في التاريخ القبطي يخرج هناك النور المقدس من قبر السيد المسيح، قائلًا " هل تحبوا نغير العيد والنور يطلع في يوم غير بتاعنا؟ - إزاي يعني! - وبعدين مش إحنا بس اللي بنحتفل بعيد القيامة في الميعاد ده، كل الكنايس الجريك أرثوذكس اشمعنى بقى احنا اللي هانعمل كده؟".
وأشار إلى أن عيد الميلاد في الدول الغربية يعتبر الكريسماس فقط، قائلاُ: "فين المسيح في الكريسماس بتاعهم؟ الناس بتطلع تتفسح وتهجص، وياخدوا إجازة طويلة، لكن المعنى الـ Religious في كنيستنا، فخلي الولاد يهيصوا في ٢٥ ديسمبر ويصلي يوم ٧ يناير، ايه المشكلة؟".
وأوضح أن المجتمعات الغربية ليس معظمهم مسيحيين، مشيرا الى أن البعض في كندا يطالبون بأن يكون يوم الجمعة إجازه لإعطاء فرصه لإخواتنا المسلمين بأن يقيموا صلاة الجمعة، كما إنهم يحصلون علي اجازات في أعيادهم الرسمية، قائلا: "ولو واحد دخل وقاله أنا يهودي وعندنا عيد أو بكره عندنا عيد هايدولوا إجازة - اشمعنى إحنا اللي نقعد نقول عشان الإجازات؟ - طيب مانطالب، عددكم مش قليل!".
وأكد روفائيل أن كل الكنائس في أمريكا وكندا قد قدموا بمطالب إلى البرلمان بالحصول علي أجازات للاحتفال بالعيد، مشيرا الي أن الاقباط في هذه البلاد تمثل اكثرية والاقباط لهم تاريخ، فكيف لم تطالبوا بحققكم ببحصول علي اجازة للاحتفال بعيد الميلاد في الدول الغربية فهذا حق لنا.
