بعد إعلان إصابته بـ"البهاق".. كيف دعم المشاهير رامي جمال؟

وأعلن المطرب رامي جمال إصابته بمرض نادر وهو البهاق، بعد ظهور بقع بيضاء اللون بمناطق بجسده، دون أن يجد له علاجا، وقرر أن يشارك الجمهور الأمر ليضع حلين أمامه إما الاعتزال أو أن يتقبله الجمهور بهذا الشكل. ونشر رامي رسالة على حسابه الشخصي بـ إنستجرام قال فيها: "الحمد لله الذي أحبنى فابتلاني وأقدرني على الصبر.. من فترة ظهرت بقع بيضا في جسمى وبالكشف عرفت إنه مرض البهاق، وجربت أنواع علاج كتير ودكاترة كتير ومفيش فايدة".

وتابع رامي جمال: "رضيت وسلمت أمري لله عشان عرفت إن الزعل بيزوده وكفاية شغلانتى وصعوبتها والقلق الدائم من المستقبل، وفعلا بقى بيزيد لدرجة لفتت نظر ناس كتير، اللى بقى يقوللى هتتعامل إزاى وأنت فنان واللي يخاف يسلم عليا واللي يسألني هو ده معدي"، موضحًا: "أنا بقالي سنة فعلا لو عندى حفلة أو تصوير بتعب على ما أشوف طريقة أخفيه بيها، لدرجة خلت ناس تقولي شوف بيزنس تاني اعمله عشان الناس مش هتقبلك كدة، وفكرت في كلامهم بصراحة".

واستكمل جمال حديثه: "لقيت إن عندي حلين يا فعلا شكرا لحد كدة على الشغلانة دي رغم حبي ليها وعدم معرفتي بغيرها، يا إما مش هداريه تاني وتقبلوني بيه وترحموا كل اللي ربنا ابتلاهم بيه من نظرة أن شكله غريب، والحمد لله على نعمة الأهل لإنهم الوحيدين اللى بيقبلوا الواحد زي ما هو".

في غصون ذلك، كتب ياسمين الخطيب، تغريدة، على حسابها الشخصي بموقع "تويتر"، قالت فيها لـ رامي جمال : "بضعة بقع بيضاء على جلدك لن تنال من شكلك ولا صوتك ولا محبتك في القلوب، غني". 

وقال الملحن مصطفى جاد، عبر حسابه الشخصي، على موقع التواصل الاجتماعي "تويتر": "صديقي الغالي و بلدياتي الجدع قوي رامي جمال.. أحب أقولك يا جبل ما يهزك ريح.. إحنا كلنا معاك وفي ضهرك ويلا عشان الناس عايزه تسمع ألبومك وأغانيك الحلوة زي ما عودتهم".

ودعمت الفنانة زينة، عبر حسابها الرسمي بموقع إنستجرام، المطرب رامي جمال، وعلقت: "إنسان محترم، ربنا يعفو عنك، للأسف إحنا في دنيا ما بترحمش، والنَّاس بقت صعبة يا ريت نحاول يكون في قلوبنا رحمة"، متابعة: "رامي إنت إنسان موهوب، يمكن أنا ما تشرفتش بمعرفتك بس قلبي معاك، وإوعى تفكر تتهزم ده مرض عادي وربنا يعفو عنك، وقول الحمد لله والنَّاس الرحيمة كتير واعتبرني من أهلك والإنسان بموهبته واحترامه وأخلاقه وبس".

ووجهت الفنانة راندا البحيري، عبر حسابها الرسمي بموقع إنستجرام، رسالة لدعم الفنان الشاب وكتبت: "الحمد لله على كل شيء، أنا بحبك أوي يا رامي، وإنت أكيد عارف ده، ربنا يقدرك على اللي هتشوفه أكيد من المجتمع، بس أنا عن نفسي بنصحك، تولع الناس، و خليك مع القريبين، وانجح واشتغل أكتر من الأول كمان، بحبك جدا".