كلهم مصطفى أبو تورته.. قصة حب تحولت إلى انتقام.. العريس انسحب في حفل الخطبة والاتهامات متبادلة

أطقم ذهب هدية.. وإقامة كاملة مجانا في فندق.. وجلسات عناية بالبشرة تطيبا للخاطر

زوج والدة العروس سببا وإصابة مفاجئة لخال العريس ورد مفاجئ لنهال شعبان

بالونة كبيرة فجرتها مواقع التواصل الاجتماعي لم تختلف كثيرًا عن سابقتها من المشاكل التي يراها البعض بلا فائدة وتنال حيزًا كبيرًا من اهتمامات رواد تلك المواقع، و"لت وعجن" لا يثمن ولا يغني من جوع، في حين يراها البعض أمر صحي من باب إشراك الناس في مناقشة قضايا حتى لو كانت غير مهمة، في سبيل الحصول على الخبرات عند مواجهة مثل تلك المواقف.

مصطفى أحمد أو كما أطلقت عليه "السوشيال ميدي"، مصطفى "تورته"، وخطيبته -التي لم تكتمل خطبتها- أصبحا حديث الرأي العام، والترند الأول في مصر، باسم #كلهم_مصطفى_تورته الشيء الذي لم يتوقعه هو بنفسه، حيث رأى أن مشكلته مجرد "زوبعة فنجان" وستمر من دون ضجة.

الواقعة جلبت تعاطف الكثيرين من رواد السوشيال ميديا، إلى نهال شعبان خطيبة مصطفى، ووصل هذا التعاطف إلى حد تقديم هدايا كبيرة إليها جبرانا لخاطرها، بينهما رآها البعض مادة إعلانية لمحلات يملكونها من باب أن "تورته" هي سلعة غذائية يمكن أن تشكل دعاية لمنتجاتهم.

اتفاجئت بأنه مش عازم صحابه.. وحسيت بحاجة غلط

الحكاية بدأت بمنشور لنهال شعبان، الخطيبة التي لم يكتمل حفل خطبتها، على صفحتها الشخصية بمواقع التواصل الاجتماعي "فيسبوك"، قائلة: طيب مش عادتي اتكلم واحكي عن حياتي الشخصية على الفيس، بس اللي حصل مش شوية فمضطرة اتكلم علشان متعبش، أنا كان مقري فتحتي زي ما كله عارف على مصطفى وخطوبتي كانت يوم السبت اللي فات المفروض، كان بينا مشاكل زي أي اتنين عاديين، وقلت دا عادي بيحصل بس اللي متخيلتش إنه يحصل إنه يسيبني في القاعة لوحدي.. اتفاجئت إنه مش عازم صحابه ولا قرايبه كلهم، وحسيت في حاجة غلط، حتى مامته وأخته مفيش واحدة فيهم جت باركتلي وقولت أمشي اليوم".

الستات اختفوا ومش مستوعبة اللي بيحصل

نهال شعبان أضافت أن "كل ما أقوله فين الشبكة اللي هنلبسها يقوللي أصل اتكب عليها شربات أصل وقع جاتوه عليها.. طب خليها بعد البوفيه وكلام كله غريب كدا لحد ما دخلنا بعد البوفيه لقيت أهله كلهم مشيوا.. وقال إيه خالوا تعب! فيقوم أهله كلهم يمشوا وأنا في القاعة لوحدي بدور عليه ألاقيه بيصرخ برا ويقول خالي عيان وبيلطم وحاجات غريبة كدا وأنا أقسم بالله ما مستوعبة اللي بيحصل هو في واحد خاله عيان عيلته كلها بتمشي الستات اختفوا بس كانوا بيهزروا فوق نسوا العيان".

اكتشفنا إنهم خدوا التورته معاهم

وأكملت نهال منشورها قائلة "والأنيل إننا اكتشفنا إنهم أخدوا التورت معاهم طب مش خالك عيان.. أخدتوا التورت معاكم ملبستنيش شبكة.. وقبل كل دا بأيام جالي  البيت وأخد التوينز بتاعت قراية الفاتحة بحجة إنه عايز يلبسني كله مرة واحدة في القاعة وأنا هبلة وافقت مجاش في بالي للحظة واحدة إنه هيعمل فيا كدا".

كان ممكن تسترجل وتقولي يالا نفركش

واختتمت الفتاة قائلة: "دلوقتي حابه أقول كل دا عشان إيه؟ كان ممكن ننهى بالمعروف من غير أذى نفسي ليا.. كان ممكن تسترجل وتيجي تقولي يلا نفركش وكنت لغيت الخطوبة.. مش جي وبترقص وتقولي محضر لك مفاجأة.. وفي نيتك تعمل فيا كدا.. حسبي الله ونعم الوكيل".

مصطفى تورته: كان لازم دى تبقى نهايتك

مصطفى أحمد علق على منشور نهال على صفحتها الشخصية قائلًا: تصدقي صعبتي علي حلو الشو ده مفيش حتى كدة لله يا محسنين أنتِ أصغير من إني أرد عليكي وأنا بجد ندمان على معرفتك، مش ندمان على اللي حصل ولو حابة تتكلمي إحكي للناس الحكاية من البداية يا أبله أنا ندمان على وقتى معاكى، أنا حبيتك بجد بس انتى للأسف ما تستاهليش الحب دا وكان لازم دي تبقى نهايتك.

رسائل تشفٍ من مصطفى لنهال

نهال قالت إن مصطفى أرسل لها رسائل تشفٍ، عقب انتهاء حفل الخطبة، يوبخها ويوضح لها سبب الانفصال المفاجئ، تلك الرسائل التي تشي بوجود نية مبيته لدى مصطفى ليحدث ما حدث.

ياريت القلم يعلمك

مصطفى جاء في رسالته: مبروك يا عروسة علشان تبقي تسمعي كلام اللي حواليكي كويس وتمشي اللي في دماغك كويس، معلش أنا عاذرك أصل المفاجأة تبعتي بكل المفاجآت بتاعتك وتاني ألف مبروك يا عروسة يا رب تكوني مبسوطة والقلم ده يعلمك ازاي تتعاملي مع اللي بعدي لو عايزة تعيشي وتفتحي بيت.

نهال: سلملي على طنط وقولها افتكري

نهال ردت على رسالته قائلة: هاتعلم إن شاء الله بس أنت يا عيني اللي مش هتبقى راجل أبدا.. الله يبارك فيك كنت حكاية في التمثيل اتجه للفن، كل اللي حوليا دول طلع عندهم حق بس معلش أنا بعمل فيمة لواحد ندل مش راجل.

مصطفى: كان لازم تشوفي بنفسك

ورد مصطفى قائلًا: بجملة غبائك رايحة تفضحي نفسك بنفسك اتلمي وادعى ربنا حد يقبلك بقرفك ده ويحقق أحلامك أنت وأهلك اللي عايزين مارد يحققها، أنا كنت بحبك بجد ومكنتش عايز أكمل حياتي مع حد تاني غير بس أنت وأهلك كان الموضوع بالنسبة ليكم سبوبة.

نهال: الدرس مخلصش

وردت نهال: الفضائح ليك ولأهلك مش أي حد يناسبنا كنت بمشي الأمور علشانك بس فعلا كنت غبية، الدرس مخلصش، سبوبة تصدق ضحكتني فوق متعش الوهم.

الأمر لم يقتصر على كونه أزمة قائمة بين شاب وفتاة انفصلا بشكل لم تصوره عقل، بل أصبح مادة إعلانية وساخرة لرواد مواقع التواصل الاجتماعي، خاصة ملاك المحال الشهيرة الذي تحينوا الفرصة واستخدموا الواقعة لترويج منتجاتهم.

محل حلويات ساخرا: التروته من عندنا

وسخر أدمن صفحة أحد أشهر محال الحلويات في مصر من الواقعة قائلًا:متزعلوش من مصطفى يا جماعة الموضوع كله إن التورته كانت من عندنا، قررنا أن نقدم تروته هدية بدل اللي أكلها خاله.

عيادة أسنان: دي ظاهرة مصطفى أبو تروته       

أدمن صفحة عيادة أسنان، كتب قائلًا مصطفى مهربش من الخطوبة لا سمح الله كل الحكاية إن العروسة أسنانها كانت بتلمع أكتر من أسنان مصطفى فالدم جري في عروقه، دي ظاهرة جديدة اسمها مصطفى أبو تروته معروفة عند أطباء الأسنان.

وتابعت لأن كل اللي أكل من التورته الملعونة حصلت له لعنة التسوس يالا الحق نفسك قبل ما يحصل كل ده وخلي سنانك أحلى مع عروستك.

طقم ذهب لنهال تطيبا لخاطرها

أعلن محل مجوهرات عن تبرعه بطقم ذهب إلى نهال شعبان، حيث كبت أدمن صفحة المحل قائلًا: نهال خطيبة مصطفى ليها عندنا طقم دهب، بجد مش هزار اللي يعرفها يبلغها.

جلسة تصوير هدية

تبرعت مصورة بجلسة تصوير هدية لنهال شعبان، قائلة عبر صفحتها الشخصية: حد يبلغ نهال خطيبة مصطفى أبو تروته إن ليها عندي سيشن هدية بجد.

دعوة للإقامة مجانا بفندق

كتب أدمن صحفة أحد الفنادق: طبعا إحنا كفندق ... ميرضيناش زعل نهال شعبان وحبينا نفرحها فعلا بحاجة بسيطة جدا إنها تيجي عندنا تنورنا في الفندق إقامة كاملة شاملة التكاليف، وليها تورته هدية.. جبناكي دهب لوخدك علشان مصطفى مينفعش يدخل من البوابة.

جلسة مساج

كتب أدمن صفحة مركز عناية بالبشرة، قائلًا: حد يبلغ خطيبة مصطفى تورته، إن ليها جلسة مساج هدية عندنا في السنتر جلسة مساج وتنظيف بشرة فري علشان تنسى اللي حصل.

نهال ترد: عمر وجعي وكسرة قلبي ما تتداوى بهدايا

وردت نهال شعبان، على تبرعات رواد السوشيال ميديا قائلة: يا جماعة أنا مش عايزة هدايا ولا أي حاجة، عمر ما وجعي وكسرة قلبي ما تتداوى بهدايا، رجعولي يوم خطوبتي وتجهيزاتي قبلها وفرحتي بفستان وحتى فرحتي بيه هو، كل ده طلع كدب كل ده وهم، هدايا إيه بس اللي بتتكلموا فيها..أنا كل شوية الصدمة بتتجدد عندي.

مصطفى أحمد أو الشهير بـ"مصطفى تورته"، قرر الحديث عن الواقعة لإيصال وجهة نظره، ورده على رواد مواقع التواصل.

الشاب العشريني رد على اتهامه بسرقة التورته، بأنه من غير المعقول أن ينفق كل هذه الأموال على حفل الخطبة وشراء الشبكة التي تعدت تكلفتها الـ20 ألف جنيه، بالإضافة إلى تكاليف الكوافير، وشراء فستان لنهال، طمعًا في "تورتة"، ساخرًا بأنه كان من الممكن أن يشتري محل "تورت".

زوج والدة نهال سبب رئيس في الانفصال

مصطفى ألمح إلى أن تصرفات زوج والدة نهال كانت سببا رئيسًا لإقدامه على الانفصال بهذا الشكل وتركه حفل الخطبة هو وأهله، عندما قال إن أهل نهال طلبوا منه تلبس الشبكة لها أولًا، ثم المغادرة، للاطمئنان على خاله الذي أصيب فجأة بضعف التنفس نتيجة مرض سرطان الرئة، فكان رده أنه لن يهرب وسيقوم بتلبيس نهال الشبكة في المنزل، عندما يطمئن على خاله، ليرفض زوج والدتها الأمر، قائلًا: "امشي روح شوف خالك ومالكش دعوة بيها إحنا هنروحها بطرقتنا"، الرد الذي أثار استغرابه ليقرر المغادرة رُغم محاولات المتواجدين حل المشكلة.

مصطفى انتظر زوبعة الفنجان ولكن الأمر تفاقم

مصطفى لم يتخيل أنه الموضوع سيصبح حديث الرأي العام ورآه زوبعة فنجان، ولن يأخذ أكبر من ذلك، وتعامل مع الموقف بشيء من اللامبالاة حيث وزع الشكولاتة على زملائه بالعمل، في اليوم التالي، لفسخ الخطبة.