سبوبة "السبلايز" تلتهم جيوب أولياء الأمور.. وأصحاب المدارس: لو مش عاجبك شوف غيرنا

بوكس كبير.. صابونتين.. ألوان خشب.. طين صلصال.. قص ولصق.. مقص بلاستيك.. قلم رصاص.. أستيكة وبراية.. 4 كراسات (١عربي،  1 Math، English، رسم).. كشكولين ماس مربعات 40 صفحة جلاد أزرق.. معطر جو.. اثنين لتر مطهر.. علبة 550 منديل.. كشكولين عربى 9 أسطر 40 صفحة جلاد أخضر.. جلاد ٣ ألوان (أحمر، أصفر، أزرق).. غسول يد وفوطة.. ٤ صور شخصية للطفل.. 6 رول ورق نشاف مطبخ كبير.. دوسيه بلاستك.. 4 فرخ فوم ألوان.. قلم سبورة.. سكيتش ملون كبير.. علبتين ألوان شمع من خامة جيدة، 10 أقلام رصاص.. 10 أساتيك.. صمغ ماركة أوهو، قلمين ماركر للسبورة أزرق وأسود، 7 مظاريف ويكتب عليها اسم الطفل، صلصال أي لون، كشكولين إنجليزى 40 صفحة جلاد أحمر، قصة عربي، بالإضافة إلى الباج واللانش بوكس واللانش باج.. غيارين داخليين للطفل وتي شرت وبنطلون في شنطة.

قديما كان أقصى ما يتحمله ولي أمر الطالب المتقدم للمدرسة هو زي مدرسي موحد مع الشنطة المدرسية التي تحتوي على عدد قليل من الكشاكيل والكراسات والقلمين الرصاص والجاف والبراية والأستيكة، وحاليا أصبحت الأمور صعبة والأوجاع تثقل كاهل ولي الأمر الذي يأمل أن يرى طفله في مدرسة جيدة بها تعليم يحقق حلمه في أن يرى ولده شخصًا مهما في المستقبل، فهناك قائمة كبيرة بمطالب المدارس الخاصة والتجريبية، تحديدا في مرحلتي الكي جي 1 و2 يبلغ تكلفتها ما يقارب 1000 أو أكثر حسب كل مدرسة، إنه  الـ"السبلايز".

يقول خالد الإتربي، إن موضوع السابلايز ليست، صعب جدا وخراب بيوت، نظرا لصعوبة توفيره مصاريف المدرسة ودفع أقساطها، وتوفير أموال السابلايز، فضلا عن الزي ومصاريف الباص.

إيمان عبد المعطي، سخرت من القائمة المطلوبة من المدرسة قائلة: مناديل مطبخ ليه من دلوقتي ده أنا مستنية أتجوز عشان أجيبها ف بيتي، وعشرة أقلام رصاص، ده إحنا كان التيرم كله بقلم واحد ولما يصغر نربطوه في البرجل، وديتول ده غالي، طب ما يمشيش معاهم علبة كلوركس جميع الأغراض وهنضف المدرسة وتبقي فلة، رايحين يتعلموا دول ولا رايحين ينضفوا المدارس ولا إيه.

وأضاف أحمد كاجو: مالها الزمزمية لونها وجمالها وريحة المية فيها وساعات كانت أمي بتحط فيها عصير وآخر بق فيها حكاية، وكان الجدل ساعتها هي بتسقع المايه ولا بتحافظ عليها ساقعة، وكانت بـ٢٥ جنيه بس.

وعلق إيهاب فتحي: علشان الولد لما يتخرج ويبقي عاطل يقعد في كافيه مش على القهوة مع اللي مجابوش سبلاي ليست ده تميز.

أحمد محمد سمش قال: والله أنا أفتكر يوم ما أبويا جابلي المسطرة الحديد اتعملي فرح في الفصل وكله بقا مبهور بيها، حتى المدرسين كانوا بياخدوها علشان يضربوا بيها العيال في الفصل، وأنا مكونتش بتضرب علشان أنا صاحب المسطرة.

ميار محمد قالت: ماما كانت بتقولي ابقي رجعي الكيس اللي فيه الأكل تاني ما ترميهوش عشان تحطلي فيه سندوتشات تاني يوم، وكان سندوتش الجبنة فوش سندوتش المربى ومعجنين بس والله كانت أحلى أيام.

سلمى مصطفى قالت: أنا كرهت أول يوم عشان السبلايز، والله القسط كوم والسبلايز كوم تاني، طب إحنا دفعنا قسط إضافي للكي جي، مش عشان الأدوات تكون متوفرة للطلاب.

وتقول رانيا مصطفى إنها أرادت التقديم لابنتها في مدرسة خاصة بمنطقة مصر الجديدة، وعندما أخبروها بمصاريف السابلايز ليست، والتي بلغت أكثر من 1000 جنيه، أخبرتهم بأن الأمور صعبة جدا لأنها ستدفع مصاريف المدرسة والباص والزي أيضًا وسيصبح الأمر عبئًا ثقيلا جدا عليها وزوجها فأخبروها أن هذا نظام المدرسة وممكن "تشوفي مدرسة غيرنا".