شهر عسل في مصر أفضل من المالديف .. محمية نبق التي لا تعرفها!

أكثر ما يضر السياحة المصرية هي "عقدة الخواجة" لا أحد يرغب في الأعتراف بان مصر وشواطئها هي من ضمن أفضل الشواطئ في العالم، لم يسبق لي زيارة المالديف ولكن سبق لي زيارة تايلاند، ولن أكرر ما قلته مسبقا ولكن معظم دول آسيا تتشابه في سلبياتها (الطعام - تكلفة الطيران - جودة الفنادق الضعيفة) وأكثر ما يميزها المناظر الطبيعية، وبالمقارنة بمصر نجد ان جودة الطعام رائعة، الفنادق ممتازة، التكلفة ستكون نصف رحلتك إلى المالديف، والمناظر الطبيعية لا تقل عن ما ستشاهده في آسيا

محمية نبق

نبق تم إعلانها محمية طبيعية سنة ٩٢، بعيدة ٣٥ كيلو متر عن شمال شرم الشيخ، أكثر حاجة بتميزها ان فيه جزء منها على الأرض وجزء داخل الماء، مساحتها ٦٠٠ كيلو متر مربع ٤٤٠ في اليابس و ١٦٠ في الماء، بتضم انواع طيور وأشجار وشعب مرجانية مش موجودة في العالم.. ١٣٤ نوع من النباتات ٩٠٪؜ منها أندثر من العالم كله، يعني مثلا على سبيل المثال وليس الحصر شجرة المانجروف اللي مش بتعيش غير في المناخ الاستوائي في المحيط الهندي والبحر الأحمر، ودي بتبقى موجودة وسط المياه المالحة وبتقدر تحولها لمياه عذبة وبتحوش الملح تحت خالص وتبجيلهم طيور من اكل أنحاء العالم، ده غير المناظر الطبيعية الأشجار وسط المياه، والأسماك اللي مش هتشوفها في اي مكان في العالم، لو فعلا عايز استرخاء وهدوء وتشوف حاجات عمرك ما شوفتها يبقى هي لازم تكون اختيارك الأول خصوصا أنها مش غالية..

الإقامة في فندق خمس نجوم بخليج نبق هيكلفك تقريبا في الليلة ١٢٠٠ جنيه قابلة للزيادة او النقصان بحسب بحثك ورغبتك في شكل الفندق اللي هتقيم فيه، وطبعا متوقفة على ميعاد زيارتك ليها.. والسعر ده تقريبا زي الأسعار الموجودة في فنادق تايلاند وبالتحديد بوكيت (٦٠٠ بات) يعني متقولش تايلاند ارخص.. لا لو حسبتها بالورقة والقلم هتلاقي ان نبق ارخص..

أيه اللي ممكن أعمله في شرم الشيخ؟

معظم شواطئ شرم الشيخ بتوفر رياضيات مائية حاجات ممكن متلقيهاش موجودة اصلا في شواطئ آسيا، غوص، تزلج على الماء، بانانا بوت، إبحار بالمظلة الباراشوت، ركوب البدال او الكانو (وده موجود بكثرة في آسيا)، الشراع.

لا تخلو شرم الشيخ من أماكن للخروج والسهرات، زي سوهو سكوير، خليج نعمة، هوليود، كل الاماكن دي فيها كافيهات ومطاعم وجميع البراندات، وتعتبر فسح ممتعة، مش هتلاقيها في بالي مثلا..

صباحا ممكن تروح بيت القرش من افضل اماكن الـ snorkeling في شرم الشيخ وعلى فكرة بيت القرش كمان فى غرف علي البحر والمناظر بتبقى تحفة، وممكن تروح أكوا بارك وفيه كذا أكوا بارك في شرم شيخ ممكن تختار منها اللي يناسبك وسعرها يبقى مناسب ليك، وطبعًا منقدرش ننسى السفاري اللى ممكن تعملها اللي مش موجودة في بلاد آسيا وهتعملها وانت مستمتع، ومن أهم العروض اللي ممكن تحضرها عرض الدولفين في شرم الشيخ.