"لا نقبل التعدي على مستقبل أولادنا".. أبرز تصريحات "السيسي" خلال افتتاح "بشائر الخير2"
افتتح الرئيس عبدالفتاح السيسي، مشروع "بشائر الخير2"، صباح اليوم الأربعاء، بمنطقة غيظ العنب في محافظة الإسكندرية، وهي المرحلة الثانية من مشروع "بشائر الخير" الذي يهدف لتسكين أهالي المناطق العشوائية لإزالتها وحمايتهم من مخاطرها الناجمة عن المباني الآيلة للسقوط والبيئة غير الآدمية التي يعيشون بها.
وأدلى "السيسي" خلال فعاليات افتتاح المشروع بعدد من التصريحات البارزة، والتي نرصدها في السطور التالية.
مشروع بشائر الخير وراءه جهد وهمة
قال الرئيس عبدالفتاح السيسي، خلال افتتاح مشروع "بشائر الخير2" إن الدولة قدمت 600 مليون جنيه للمشروع من خلال وزارة الإسكان.
وأضاف "السيسي" قائلًا: "بشائر الخير وراءه جهد وهمة من رجال الأعمال وبنك مصر وتحيا مصر، ولكن مفيش الأموال الكافية من كل العناصر اللي تحدثت عنها لعمل هذه المشروعات".
وتابع: "أقول ذلك لإصلاح الأمر والمجتمع المدني يشارك معانا، لأن المجتمع المدني يقدر، المبلغ المنتظر 7 أو 8 أو 9.. طيب المبلغ الذي تم جمعه حتى الآن كام؟".
واستطرد "السيسي" قائلًا: "أقول هذا الكلام عشان زمايلنا هنا وأهلنا يعرفوا الحكاية ماشية إزاي.. لو عاوزين ندخل في 3500 وحدة كمان فدا يتطلب أكثر من 5 أو 7 مليارات جنيه".
غياب الحوكمة ضيع حق الدولة في عقود المحاجر
وتابع الرئيس عبدالفتاح السيسي، خلال افتتاح المشروع السكني، أن غياب الحوكمة تسبب في ضياع حق الدولة في عقود المحاجر والساحات والمحلات.
ودعا "السيسي" إلى تطبيق آلية منضبطة وشديدة القصوى لضمان الحصول على حقوق الدولة.
وقال الرئيس: "كل قائد تعبوي مسؤول مع مديري الأمن والمحافظ على الكلام دا، وهنشوف هنقدر ناخد حقوق الدولة من الناس زي ما نبديهم حقهم ولا لأ".
إحنا كلنا كمسؤولين مش بناخد بالنا من حق الدولة
ووجه الرئيس عبدالفتاح السيسي، رسالة إلى المسؤولين بوزارات المالية والمحليات قائلًا: "لما نعمل عقود مع ناس مدنيين من أهلنا مش هينفع نبقا ناسيين ناخد الفلوس، ولا يتم تحصيلها بالسنين الطويلة وندخل في نزاع.. دا كلام غريب ومحدش واخد باله منه وخاصة في الحديقة الدولية".
وتابع "السيسي" مضيفًا: "يا تعمل عقد حكومي واعقد أوله في إسكندرية وآخره أسوان.. وثيقة مؤمنة تخرج لكل الناس وتقول لكل واحد حقنا إيه.. انت تاخد وإحنا ناخد لكن انت تاخد لوحدك لا".
واستطرد: "إحنا كلنا كمسؤولين مش بناخد بالنا من حق الدولة وهو أمر لن أسمح به، وكل مسؤول ينتبه لكل قرش.. ندي للناس حقها وناخد حقنا".
عجز شبكات الصرف عن استعادة مياه الأمطار بسبب العشوائيات
وقال السيسي، إن عجز شبكات الصرف في استعادة مياه الأمطار يرجع إلى البناء العشوائي الذي لايتناسب مع قدرات المجتمع الحالية.
وتوجه إلى المسؤولين قائلًا: "اشرحوا للناس سبب عدم قدرة شبكات الصرف على استيعاب مياه المطر، لأنها كانت مجهزة لعدد عمارات ووحدات بشكل وارتفاع معين.. ولكن حدث أن تضاعفت هذه الوحدات.. والدولة تجري دايما عشان تلاحق التطور".
لا نقبل التعدي على مستقبل أولادنا
وأكد الرئيس عبدالفتاح السيسي، أن القوات المسلحة ومدراء الأمن والداخلية معنيين بتحقيق الانضباط مضيفًا: "وأنا جاي بالطيارة شوفت غرب المطار وجنوبه في النزهة.. الناس بتبني.. بيبنوا إيه؟ الأراضي غير مخططة ولم يحصلوا على تراخيص، فلماذا يسكت المسؤولون؟.. عشان هما كتير؟.. يعني هيغلبوا بالكثرة؟.
ووجه "السيسي" حديثه لمدير أمن الإسكندرية والداخلية قائلًا: "الكلام دا فيه تجاوز شديد، الناس تعودت عليه ولم يعد مقبولًا الآن.. هنفضل تعبانين ودولة تعبانة".
وتابع: "بحيرة كينج مريوط ترجع كما كانت وأحسن وهشيل كل المخالفات وهزيل كل اللى عمل حاجة وأقول ذلك لكل متجاوز.. محدش يقبل التعدي على مستقبل أولادنا.. البعض يظن أن الدولة مقصرة بسبب انقطاع المياه والصرف الصحي.. إحنا كمسئولين وكمواطنين علينا التزام تجاه بلدنا وأولادنا.. هذا الكلام موجود في إسكندرية والقاهرة وكل محافظات الدولة.. قولوا لي اعمل إيه.. ولا أسكت.. إذا كان مطلوب منى أسكت أسكت.. أنتوا مش بتغيروا ولا صعبان عليكم بلدكم؟.. هو الحب كلام وناخد المكسب حتى لو لم يكن سليم!.. بحيرة المنزلة عاوزة 30 مليار جنيه عشان تعود لما كانت عليه".
تحصيل 400 مليون جنيه من الحديقة الدولية
وفي سياق متصل، طالب الرئيس، بضبط عقود الحديقة الدولية في الإسكندرية، مؤكدًا على ضرورة تحصيل 400 مليون جنيه من الحديقة أو إخلائها تمامًا.
وقال "السيسي" تعقيبًا على كلام محافظ الإسكندرية عن حجم مديونية الحديقة الدولية التي بلغت 427 مليون جنيه: "لما يكون فيه 400 مليون مديونية يبقا الناس ماكانوش بيدفعوا إيجاراتهم من عشرين سنة، يبقا دا معناه إنهم بقالهم 20 سنة مدفعوش".
وأضاف: "المنطقة الشمالية العسكرية هي المسؤولة عن الموضوع.. يا يجيبولي 400 مليون جنيه يا تفضى، وعاوز تقرير كل 15 يا ناخد حقنا يا بلاش".
إنتوا بتتكلموا كإني مقصر في حقكم
وانتقد الرئيس، سياسة الإنجاب لدى المصريين، وذلك تعليقًا على أزمة سيدة أنجبت 6 أبناء وتعيش بالعشوائيات في الإسكندرية، حيث وجه لها سؤال: "بتقولي أنا عندي 6 يناموا فين؟ وهقولك إنتي بردو مش تفكري قبل ما تجيبي الستة هتنيميهم فين؟.. إحنا بنحل مسألة لكن كلنا لازم نقف ونعرف انت عملت في نفسك كده ليه؟".
وتابع "السيسي" قائلًا: "في حد يقولي متعملهمش.. مقدرش.. لازم نعمل ليهم.. بس بقولهم معقول وانت بتحكي الحكاية بتتكلم وكأن أنا اللي مقصر في حقك أو الدولة اللي مقصرة، لا والله انت اللي مقصر في حق نفسك، بقى أنت قاعد في أوضة تجيب أربعة تأكلهم إزاي وتعلمهم إزاي.. واحد يقولي بلاش الكلام ده خلي الناس تحبك، ربنا مطلع عليا وإنه لمصلحتكم".
