رحمة عبدالجليل تكتب: "مينى عتاب"
اسفه حبيبى شيلتك ذنب مش ذنبك، حقك عليا والله ده من غير ما اقصد، ما انت برضو ساعات بتفاجئنى وبتخيب ظنى بيرد غريب، يا جدع أقولك بالليل تصدق مصليتش العشاء حاسة انى مكسلة ترد بسرعة تقولى (خليكى مكسلة) بنبرة صوت كله حده.
طب ده كلام برضو ادينى خدت بيردك وروحت مكسلة اكتر وغلبنى النوم ونمت من غير ما أصلى واديك انت بسبب سؤالى ليك وردك انت عليه خدت ذنب مش ذنبك ولا ليك فيه.
اعزرنى حبيبى متوقعتش منك الرد ده ،انا بقولك وغردى انك كالعادة بكلامك بتقوينى وبتشجعنى وبكلامك الحلو الحماس بيجينى، عموما انت برضو علشان حبيبى انا دائما بلتمسلك العذر ولكن حبيت أقولك بس علشان عندك ذنب متعرفهوش لازم تستغفر ربك عليه ، ومره تانى اما احتاج دافعه منك رد وشجعنى وحمسنى بكلامك المعسول كالعادة يا عسول.
بحبك وده كان مينى عتاب ليك...
*خلوا بالكوا بقى بجد اللى بيحب بيتعلق بأشاية من كلام حبيبه ليه سواء بقى حبيبه ده كان أب ولا اخ ولا صديق ولا خطيب ولا زوج ،بكلامكم لينا بنطلع سابع سما وبكلام تانى بننزل سابع ارض ، واكيد فى مسئوليه عليكم مادام فى علاقة قوية بتربطكم ببعض يبقى لازم تخافوا على بعض فى ابسط حاجه واشد حاجه وتوعدوا بعض ان اللى هيقع فيكم التانى مش هيسمحله ابدا بده وهيعينه وهيشد ايده للخير والصح علشان مش هيكون ليكم غير بعض ولو ماشجعتوش بعض وخفتم على بعض مين هيخاف عليكم...
شكرا وتحياتى للجميع...
