ريحتك مسك
مساء الخير أستاذة نيفين
عندي مشكلة وهية اني بستعمل عطور للجسم كتيرة والعطور العادية لكن برضه مش بحس ان الجسم ريحته حلوة او بتروح بسرعة من الهدوم وبعدين بخاف من رش الحاجات دي بشكل مباشر وبعدها اتعرض للشمس فيحل بقع وحاجات كدة .. يا ترى فيه حل للموضوع ده ؟
نيرمين
فضفضة
محررة الصفحة .. نيفين حجازي
صديقتي نيرمين .. أولا فيه معلومة لازم تعرفيها وهية إن الجسم نفسه بيستمد رائحته من أنواع الأكل .. خليني أقول الأول حاجة .. قللي من تناول الأطعمة صاحبة الرائحة النفاذة زي البهارات والكرنب والثوم والبصل وغيرهم , تاني حاجة .. حاولي تتعودي على شرب كوب ماء صباحا به ملعقة من ماء الورد فبخلاف فوائدة الكتيرة هوة بيساعد على تعطير الجسم بدليل لما تاكلي بسطرمة مثلا جسمك بيفضل مدة ريحته عاملة إزاي ؟ .. بنفس المنطق خلينا نتعود على الأطعمة أو المشروبات اللي بتساعد على تعطير الجسم بشكل طبيعي زي النعناع والبرتقال وماء الورد والزنجبيل وغيرها , حاجاة كمان .. ممكن تعطري جسمك وملابسك وشعرك بطريقة التبخير .. يعني البخور ولو بتحبي المسك والأنواع دي من العطور حاولي تشتريها من الأماكن الموثوق فيها لكن في الحالة دي هتشتري الزيوت بتاعتها وتحطيها على المبخرة وبعد الدش والجسم لسة رطب هتبخري جسمك وشعرك وكذلك بالنسبة للملابس لو بتنشري الهدوم على منشر داخلي حطي المبخرة قريبة من الهدوم قبل ماتنشف بشوية وبكدة هتبقى ريحة الهدوم كمان العطر اللي انتي بتفضليه وعلى فكرة الطرق دي معروفة خصوصا في الدول العربية والسودان همة مشهورين بيها .. حاجة أخيرة وممكن تلاقيها في مصر من عند body shop أو المحلات التانية المتخصصة في بيع المنتجات دي وهية المعطرات الخاصة بالجسم والكريمات المعطرة الخاصة بالجسم كمان , دي كويسة لو هتكسلي تشتري الحاجات التانية وعلى فكرة كل ما هتعودي جسمك على إنه يبقى معطر هيفضل كدة دايما حتى لو توقفتي عن إستخدام العطور العادية المعتادة اللي بتستخدميها للملابس وانتي خارجة , ارجو أن ردي يكون مفيد لكن دي معلوماتي عن تعطير الجسم والشعر والملابس .. شكرا ليكي نيرمين ولو محتاجة حاجة تانية ابعتيلي .
ملحوظة : شرب ماء الورد يوميا ملعقة صغيرة تضاف الى كوب ماء يساعد على توحيد لون البشرة ويساعد على إختفاء النمش .
