رباب أنور تكتب : لما ... تبقى ... أكيد ... الثورة جاية
لما دمك يبقى مَية
تبقى أكيد بعت القضية
و نسيت دم اللي راحوا
و اللي هتكوا و استباحوا
شرف الوطن
و عرض الصبية
لما أقرب الناس يخونك
تهرب الدمعة في عيونك
و مصيرك يتقرر بدونك
تبقى خلاص بعت القضية
لااااااااااااااااااااااا يا صاحبي
لما شبابك يروح هدر في ماتش كورة
لما ( عين العقل ) في بلدنا تبقى عورة
( تمسك ) في ( الشهيد )
و (تسيب ) البلطجية
تبقى أكيد الثورة جاية
لما الحقيقة تسد ( عين الشمس )
ويقولولك ( بُكرة) أحلى مــ (النهاردة)
تقول (الأمس)
لما تشوف الصورة (بالمقلوب)
و تتجرف الأرض ( الخصوب )
و تنشف البقرة ( الحلوب )
أكيد خلاص الثورة جاية
لما تمشي جنب الحيطة تتشد اشتباه
ويبقى ( السجن للجدعان )
و الحرية للجُناه
لما محكمتك يا مدني تبقى عسكرية
و محاكمة ( فرعون ) تبقى ( تمثيلية )
تبقى أكيد فيه ثورة جاية
لما تتلم ( المعونة )
من ست شقيانة طول النهار
و اللي ( باعونا )
واشتروا فينا حساباتهم بالدولار
لما يبقى صوت المؤامرة و السلاح
أقوى من صوت الحوار
أكيد أكيد الثورة جاية
بس ساعتها يا صاحبي إكتب لابنك ( وصية )
قوله أنا ( المذكور أدناه )
أقر و أعترف بالخيبة القوية
يابني لما تقوم بثورة
إوعاك تغلط غلطتي
تمشي و تسيب الميدان
إوعاك تاخدك تفاصيل الحياة
و تضيع خطاويك في كل إتجاه
تمشي تشحت الحرية تاني
و تدوب كعابك من اللف في مظاهرة أولها فين ؟؟
و آخرها تاه !!
إوعاك تصدق اللي يقول حميتك
الحامي ربك هو سيدك
و إيمانك بالقضية طوق النجاه
يابني لما تقوم بثورة
حاسب تغطي عينك غشاوة
أو تعشش في عقلك غباوة
أو تتمكن من قلبك قساوة
أو يغريك كرسي
بمنصب أو بـــِ جاه
و اطلب العون من الإله .....
