محمد إبراهيم يكتب : مبتحلميش

مبتحلميش ..

انا جنب منك أهو بجد ..

مش هقرصك متهزريش ..

انا جوا منك راح أعيش

فتصدقى متصدقيش ..

انتى فـ الحالتين أكيد

مبتحلميش ..

مجنون وبيعشق مجنونه

ماشيين فـ طريق مجنون جدا

يحدفلها طوب فـ البلكونه

تطلع قبل الفجر ما يدن

تضحكله فيضحك لعنيها

ويقول يا حماره يا حلوه انتى

انا قاعد من ساعه بحالها

فترد تقوله إشتم إشتم ..

وتطول عـ الآخر بالها ..

تحدفله الورده المعتاده

يحدفلها هو تويكسايه ..

وتدوب ببساطه فـ شفايفها

زى السكر فـ الكوبايه ..

وياخدهم ليلهم للآخر

وعنيها تغرقه فـ بحورها

وإحساسه يتوه مع تأثبرها

لحد ما تدخل لأوضتها وترد الشيش