5 قواعد لـ "الإتيكيت" داخل العمل.. تعرفي عليها!
الطريقة اللى بنتعامل بيها فى الشغل وطريقة كلامنا مع الناس من حوالينا مهمة جدا ، لانه مع اول غلطة او تصرف مش مناسب بتكون الناس عننا فكرة مش كويسة واوقات كتير بتبقى مش صحيحة وده بيبقى له تأثير سيئ على شغلنا بشكل كبير، وعلشان كده أتيكيت العلاقات فى الشغل وازاى نتصرف فى المواقف المختلفة بيعتبر من الحاجات المهمة اللى لازم نبقى كلنا عارفينها لانها ممكن يبقى ليها تأثير كبير على الـ career بتاعنا، وخصوصا اننا بنقضى مع زمايلنا فى المكتب وقت اكتر ما بنقضيه فى البيت مع عيلتنا، فلما تبقى علاقتنا معاهم كويسة ده هيخلى وقت الشغل ممتع اكتر وكمان صحى، اعرفى معانا ايه هى اهم نصايح و قواعد أتيكيت العلاقات فى الشغل.
نصايح و قواعد أتيكيت العلاقات فى الشغل ..
1- علاقتك بمديرك و رؤسائك:
علاقتك بمديرك او رئيسك فى الشغل طبيعى تكون واحده من اهم العلاقات اللى لازم تكونى حريصة انها تكون كويسة طول الوقت، ورغم انه فى عالم الشغل دلوقتى كتير من الشركات بدأت تتخلى عن مفهوم المدير او "الـ Boss" وبدأت تحوله لانه يكون leader الا انه علاقة الرئيس بالمرؤوس بتفضل موجودة، وعلشان تقدرى تكونى علاقة relaxed من غير توتر بينك وبين مديرك ممكن تتبعى النصايح دى :
– كلميه دايما بـ"حضرتك" او Mr / Ms قبل اسمه.
– لو بتتناقشوا او بتاخدوا قرار يخص الشغل خلي المدير هو اللى يدير النقاش.
– فى اوقات الراحة الشخصية وانتى قاعدة مع زمايلك، اوعى تشتكى من الشغل او الـ orders اللى بيديهالك مديرك، خلى دايما كلامك فى الشغل professional.
– لو عندك شكوى ماتحكيهاش لزمايلك ولا تقدميها لمديرك بشكل مباشر ، وقدميها فى الـ chain of commands الخاص بالشغل او "تسلسل تقديم الشكاوى" ، لانه كل مؤسسة بيبقى ليها نظام معين لتقديم الشكاوى.
– لو اتعرضتى لمضايقات من مديرك او المشرف بتاعك، حاولى ماتدخليش معاه فى مناقشة كلامية واتقدمى للقسم المختص بحل النوع ده من المشكلات.
2- علاقتك بزمايلك:
لو كنتى جديدة فى شغلك، خدى شوية وقت فى انك تبدأى واحده واحده تتعودى على طبيعة زمايلك الجداد فى الشغل و تتعرفى على اطباعهم وحاولى تبقى ودودة معاهم، واول ما تحسي انك بدأتى تفهميهم حاولى تعملى حاجه لطيفة لزمايلك تكسر الحاجز اللى بيبقى موجود بينا وبين اى حد جديد بنتعامل معاه لاول مرة، زى انك تعمليلهم حاجه حلوة مثلا وتاخديها معاكى الشغل .
ازاى تحافظى على علاقة كويسة مع زمايلك:
خليكى دايما فاكرة انه الانطباعات الاولى حتى لو ماكانتش دايمة بتفرق كتير فى تكوين الصورة عنك، وافتكرى دايما النصايح دى:
– احفظى اسماء والقاب زمايلك.
– احفظى وظيفة و title كل حد.
– مسؤوليات و صلاحيات كل حد فى الشغل وترتيبهم الوظيفى بالنسبة لك.
لو حد من زمايلك طلب منك انك تساعديه فى مشروع خاص بالشغل وانتى تقدرى تساعديه فعلا يبقى ماتتأخريش وحاولى دايما تعرضى المساعدة وتتعاونى مع زمايلك، المساعدة دى هتتقدر من كل الناس حواليكى وكمان رؤسائك، لكن خدى بالك تبقى المساعده دى دايما فى هدوء من غير ما تبقى بتتباهى بيها طول الوقت.
3- ستايل اللبس:
طبعا من أهم قواعد أتيكيت الشغل هو ازاى هتلبسي، معظم الشركات بيبقى ليها dress code معين او uniform بتلزم بيه الموظفين بتوعها، لو لسه بتشتغلى جديد فى الشركة اسألى عن الـ dress code .ولو مفيش اعتمدى على الـ common sense فى اختيارك للبسك وحاولى يكون دايما بستايل الفورمال او الـ semi – formal، اعرفى هنا نصايح و قواعد أتيكيت اختيار ستايلك فى المناسبات المختلفة .
4- علاقتك بالعملاء:
اكيد فى شغلك ممكن تكونى بتتعاملى مع عملاء او زباين طبيعتهم مختلفة عن بعضها بشكل كبير ، الأتيكيت المتبع فى المواقف دى هو انك تسلمى على العميل وانتى مبتسمة، وبعد كده تعرفى نفسك باسمك ووظيفتك ، وتسألى هما محتاجين ايه وازاى ممكن تساعديهم. وحاولى لو اللى هما عايزينه هياخد وقت وهيضطروا يستنوا انك تبعتيلهم حاجه يشربوها، افتكرى دايما انك واجهة الشركة او المكان اللى بتشتغلى فيه علشان كده الـ attitude بتاعك مهم.
5- Teamwork:
الشركات بطبيعة الحال بتتوقع من الموظفين بتوعها انهم يكونوا بيشكلوا فريق عمل يقدر يشتغل مع بعضه فى تناغم وانهم يكملوا شغل بعض كـ teamwork، وده معناه انك لازم تتقبلى دورك و الـ tasks اللى بتخديها ضمن سلسلة العمل دى و تنفذيها بأحسن طريقة ممكنه، لأنه جودة الشغل اللى هتقدميه هيأثر على شغل باقى الـ team من حواليكى. انك تقدرى تبقى جزء فعال فى الـ teamwork بيعتبر من أهم قواعد أتيكيت العلاقات فى الشغل اللى مهم تبقى عارفاها.
