الأول أكثرهم انتقامًا.. 5 طرق ابتكرتها الفتيات لردع المتحرشين
حملات كثيرة، وعقوبات أكثر تلاحق المتحرشين، وبالرغم من ذلك لم تتوقف الأزمة التي تهدد الكثير من الفتيات، سواء كانوا صغارًا أو كبار، الأمر الذي جعلهم يقومون بابتكار عدة طرق انتقامية للرد على المتحرشين.
هتنتقمي إزاي من اللي هيتحرش بيكي؟
"الفجر" تواصلت مع عدد من الفتيات، سمعت خلالها إجابتهن على سؤال "هتعملي ايه لو أتحرش بيكي حد في الزحمة"، لترصد أبرز الإجابات الانتقامية التي حددتها الفتيات للرد على إهانات التحرش بهن.
افضحيه
رأت سلوى خالد، أن أحسن طريقة للانتقام من المتحرشين هو فضيحتهم، فقالت: "الطريقة المثالية للانتقام من أي حد اتحرش بيكي، إنك تصوريه، وتنزلي الصورة في جروب امسك متحرش، عشان يتفضح و الناس يتجنبوا التعامل معاه، لأن فيه بنات كتير مش هتقدر تاخد رد فعل مع المتحرشين".
اتهميه بالسرقة
وأشارت دعاء إبراهيم، إلى سلبية الشعب المصري مع المتحرشين، بأن يلقوا اللوم على الفتيات، فرأت أن طريقة للانتقام الوحيدة هو اتهام المتحرش بالسرقة فتقول: "الحل الوحيد علشان تنتقمي من المتحرشين صوتى ولمى عليه الدنيا وقولي حرامي علشان ياخد علقة موت وماتقوليش متحرش لأنك لو قولتي ماحدش هايتحرك و هيلومكي أنتي".
وقالت إسراء حسين: "الحل إنك تصوتي وتقولى حرامي ياناس سرق الـ ١٠٠ جنيه اللي في جيبى، والناس بتكره الحرميه أوي وهتضربه ويطلعوا من جيبه الـ ١٠٠ جنيه تبقي عورتيه وقهرتيه".
اضربيه في قصبة رجله
وأضافت شيماء علي، أن الضرب خير انتقام للمرأة لرد كرامتها الذي يهينها المتحرش، فقالت: "احسن طريقة تنتقمي بيها من المتحرش أنك تضربيه بس برجلك يعنى اضربيه في قصبه رجله جامد برجلك لأن الضرب في قصبه الرجل هتخليه يوطى من الوجع وفي الحالة دي مش هيعرف يتهجم عليكى أو يمد ايده".
شكيه بالدبوس
وأوضحت ياسمين عزام، أن شك المتحرش بالدبوس وسيلة المرأة الأسرع والأسهل للانتقام من المتحرش، فقالت في رسالة لكل فتاة: شيلي في ايدك دبوس طول ما انتي ماشيه، واللي يتحرش بيكي شوكيه، وخليه يتوجع بصوت عالي، شكه كده علي خوانة، ولو قالولك ليه كده قوليلهم متحرش وبأدبه".
زعقيله وأحبسيه
ورأت عبير محمد، أن هناك الكثير من الفتيات لن تكون قادرة على مواجهة المتحرش بالضرب، فأشارت إلى أن الصوت العالي هو الذي سيرهب المتحرش، والقانون هو وسيلة الانتقام، فقالت: "لو قدرتي تضربي اللي اتحرش يبقى كويس جداً، لو خوفتي و غالباً دة الي هيحصل يبقى لازم تاخدي خطوة تبعدي عنه و تزعقي جداً و تهزقيه، ومتسبيهوش غير في القسم وتعمليله محضر ومتسبيهوش".
