صفحة Egyptian Single Mothers ترسل استغاثة لكل الوزارات المعنية

نيرمين سالم 
صاحبة مبادرة تجميع الأمهات السينجل ومساعدتهم 

 

عايزة صوتنا يوصل لكل الدنيا. ياوزارة التضامن الاجتماعي.. فين السياسات اللي بتدعم الأم المعيلة؟ فين فرص العمل ليها في ضوء ظروفها؟ فين الرعاية الصحية النفسية ليها ولولادها؟ فين دور الحضانة؟ فين التأمين الصحي والرعاية الاجتماعية؟ فين تعليمها وتطويرها وتنميتها لتكون عضو فعال في المجتمع؟

ياوزارة العدل.. فين الرحمة وفين العدل؟ فين القوانين والتشريعات اللي تعفو الأم من المرمطة في المحاكم بالسنين عشان تاخد أدنى حقوق ولادها؟ فين السرعة في اجراءات التقاضي؟ فين تغليظ العقوبة على الأب الذي لا ينفق؟

ياوزارة التعليم.. فين السياسات التعليمية اللي بتدعم الام المعيلة؟ فين تسهيل اجراءت تحويل ابناء الامهات المعيلات بين المدارس؟ انتوا مش واخدين بالكم إن الأم دى بتحولهم عشان مش قادرة تدفع المصاريف اللي ابوهم اصلا المفروض يدفعها ومتهرب من مسئوليته؟ يعنى هي نفسيتها ونفسية ولادها زي الزفت اصلاً و مش مستحملة؟!! فين تخفيضات على المصاريف المدرسية لابناء الأم المعيلة؟ فين التسهيلات لقبول اولادها في المدارس الحكومية والتجريبية وعدم تعقيد الشروط خاصة فيما يتعلق باكتمال العدد؟ انتوا بتصعبوها علينا ليه؟ طب يعنى لما يخرجوا من التعليم خالص و مستقبلهم يضيع ونسبة اطفال الشوارع تزيد اكتر ماهي زايدة هاتنبسطوا اوى؟

يا منظمات وجمعيات اهلية ووطنية وحقوقية.. فين الأم المعيلة من برامجكم؟ فين دعم مشاريع الأمهات المعيلات؟ فين تعليمهم حرفة أو وظيفة يصرفوا بيها على ولادهم؟ فين تنمية مهاراتهم وتمكينهم ودعمهم لمواصلة الحياة.

يا شركات ورجال و سيدات اعمال.. فين الأم المعيلة من سياستكم التوظيفية ومسئوليات شركاتكم الاجتماعية

يا دكاترة ومحاميين ومدرسين و متخصصيين واستشاريين وجميع افراد المجتمع.. الأم المعيلة محتاجة لجزء منه؟

يا ميديا.. شكراً على دعمكم لينا ووضع خطوط حمراء كتيرة تحت تفاصيل القضية.. أنا في أقل من ٤ شهور طلعت فى ٧ لقاءات تليفزيونية لدعم القضية وده شيء جميل جداً لكن احنا بنطمع في اكتر و بنأمل في تصعيد اللقاءات إلى مستوى الجهات المعنية بالأمر في الدولة.

انا جمعتلكم السنجل مامز اهم بكل مشاكلهم وتحدياتهم واحلامهم عشان نشوف هاتقدروا تعملولهم إيه واحب ابلغكم إن قضية السنجل مامز في مصر تحولت من قضية فردية لقضايا قومية تمس كل بيت وكل فرد من افراد المجتمع. واصبحت محتاجة انكوا تعيدوا النظر فى سياسات وقوانين كتيرة عشان تتعاملوا معاها بنجاح على المستوى الذي يليق بيها و يليق بحجم الخسائر اللي هاتحصل لو لم يتم التعامل معاها بالشكل اللائق.

دة احنا كمان عندنا سنجل مامز فى الجروب ناجحيين ومشرفين اوى، قدروا يتجاوزا ظروفهم ويقفوا على رجليهم ودلوقتي عايزين يحطوا اديهم فى اديا عشان ناخد بإيد كل سنجل مام لسة منهارة وضايعة ومش عارفة تواصل حياتها ازاى، يعنى سنجل مامز بيدعموا سنجل مامز!!! لحد ماحد مسئول ينظر للقضية بروح القانون لا بنصوصه ومواده وبروح الانسانية لا بروح الواجب الوظيفي. وقريباً جداً هاعلن عن المبادرة دي، يمكن دول يكونوا مثل ليكوا تحتذوا بيه في أمانة المسؤلية.

باحلم  لو كل مسئول في مصر يشوف البوست ده ويقدر يقدملنا حاجة تهون علينا.