"انا اتغيرت".. قصة رائعة عن الفروق بين الزوجات والأمهات

انا اتجوزت يادكتورة وفاكر ان كل الستات زى بعض وان مراتى هتكون زى أمى
امى ربتنى بعد طلاقها وصرفت علينا وربتنا وكبرتنا وعاشت حياتها كلها لينا
فأنا كنت فاكر ان مراتى نسخة من أمى
انا كنت برجع البيت بعد الشغل والكلية ألاقى الراحة والدلع...أمى بتأكلنى وتحضر هدومى وتهدى البيت علشان انام وتنفذلى كل طلباتى
و بعدين انزل مع اصحابى وارجع آكل وأنام علشان اصحى الصبح اروح الشغل تانى
كنت اتصل بيها انا عازم اصحابى يا ماما ارجع الاقيها مجهزة مالذ وطاب من الطعام ومبسوطة وسعيدة
كنت اقولها انا هسافر اتفسح مع اصحابى...تدينى الفلوس وتدعيلى ربنا يسعدك يا حبيبى
كنت ممكن أسهر للفجر مع اصحابى نلعب بلاى استيشن وارجع محدش يقولى كنت فين ورحت فين
و بعد ما اتجوزت وامى ساعدتنى فى جوازى..
كنت فاكر ان مراتى هتكون زيها..
وان حياتى مش هتتغير كتير عن حياتى السابقة
لقيت مراتى طول النهار منكدة ومكشرة فى وشى مش عارف ليه.
حتى اقنعت نفسى ان هى وشها كدة وان كل الستات كدة
طول النهار تطلب منى الاهتمام
و انا مش عارف يعنى عايزانى اهتم بيها ازاى..عايزة تحبسنى جنبها ؟
انا امى عمرها ماطلبت منى اهتمام
ارجع من القاعدة الحلوة مع اصحابى الاقى الوش الخشب
اروح اسافر اتفسح الاقى عياط وصراخ وعويل
زهقت منها وحسيت برغبة فى انى أطلقها وارجع اعيش مع امى تانى وخاصة بعد ولادة ابننا الاول وحجتها انها دايما تعبانة ومرهقة وتهربها منى ومن العلاقة الخاصة بيننا
وبعد كدة كرهها لأمى وخناقاتها معاها دايما لاسباب تافهة
نصحونى اصحابى انى استحمل لان كل الستات كدة نكديين ومش حاسين بالنعمة الى هم فيها
لكن كلمت دكتورة نفسية قالتلي (قبل ما تطالب بالحب اسأل نفسك هل انت تحب ؟)
حسستنى انى مش مرتاح مع مراتى ونفسى اطلقها...مايمكن المشكلة فى أنا
عرفت من كلامها ان مراتى غير امى..و انى لازم اعبر عن الحب لمراتى علشان احافظ على حبها لى...
لان حب الزوجة مكتسب ومحتاج رعاية وصيانة مش زى حب الأم فطرى ومش محتاج رعاية
انا ياما كنت بقارنهم ببعض واقولها طبيخ امى احلى ورتبى دولابى زى امى وامى كانت بتعمل كذا وتسوى كذا زرعت فى قلبها الكره ليها للأسف
انا كنت حاسس انى بدال بشتغل وبجيب لها فلوس ومعيشها فى مستوى كويس يبقى دا كل المطلوب منى
عرفت يعنى ايه اهتم...ماكنتش عارف قبل كدة يعنى ايه ؟
يعنى اقعد معاها واسمعها واخليها تطلع الى فى قلبها وعقلها علشان أقدر أفهمها هى..لانها شخصية تانية غير امى
عرفت انها مش بتحب العزايم..زى ماكانت امى بتحبها
عرفت انها مش بتحب الاختلاط بالناس اوى واحترمت كدة وخليت علاقتها باهلى رسمية....ودا كان غير امى خالص
عرفت انها كانت بتحب النظام والنظافة اوى وبتضايق جدا لما ارمى هدومى وجزمتى وشراباتى واشيائى فى اى مكان...مع ان امى مكانتش بتعترض على كدة
عرفت انها حساسة لكلمات النقد والتعليمات والمقارنة الدائمة بينها وبين أمى...مع ان ماما كنت طول النهار بتأمر وأدلع عليها ومكانتش بتزعل منى
عرفت انى لازم اروح معاها السوق..اروح معاها للدكتور..اروح معاها افسحها فهى مالهاش اصحاب وانا صاحبها الوحيد..مع ان امى مكانتش بتطالبنى بالحاجات دى خالص
اتعلمت ان لما تكون محتاجة لى..تعبانة..زعلانة..متضايقة...مضغوطة لازم اكون جنبها علشان تحس بجد انى راجلها وسندها وتحس بالامان معايا
اتعلمت انى اعبر عن حبى ليها باساليب مختلفة ومتنوعة من اللمسات الى الكلام الطيب الى الهدايا الى المساعدة ليها باى حاجة مهما كانت بسيطة
لان حبى فى قلبها بيقل مع الوقت وبيتحول عطاءها الى عطاء قهرى مش عطاء بحب ولازم اعمل حاجة كل شوية تزود الحب دا...فالحب أخذ وعطاء
و بقدر ما هتدى هتاخد
عرفت انى قبل ما اعمل حاجة لنفسى اشوف عملتها ليها ولا لأ ؟
قبل ما انزل مع اصحابى...اقعد معاها شوية قاعدة حلوة..اهزر معاها زى ما بهزر مع اصحابى..الاعبها زى مابلعب مع اصحابى
قبل ما اسافر معاهم اسفرها وافسحها وابسطها
قبل ما اطالبها انها تروح لامى وتزورها وتحترمها احترم انا كمان اهلها وازورهم واجاملهم وابرهم
اتعلمت ان علاقتى بزوجتى غير علاقتى بأمى خالص
وان الحب بين الزوجين أخذ وعطاء
انا عرفت وفهمت وبدأت فعلا احسن من علاقتى بمراتى
و بدأت اشوفها مبتسمة ومبسوطة...مع انى كنت فاكر ان هى اصلا وشها كدة
انا بدأت احس بالسعادة الزوجية الى كان الكل بيقول انها حلم
و اكتشفت انى كنت السبب فى تعاستى
ولسة بتعلم ازاى اتعامل مع ابنى....
انا مش عايزه يحس انى مجرد أب فى البطاقة بس..زى ما حسيت بالاحساس دا مع أبويا