طلاب الثانوية بالبحيرة لـ"الفجر": "نحتاج رد وزير التعليم سريعا لنحدد مصيرنا" (فيديو)

أكد محمد أحمد هلال، طالب بالثانوية العامة قسم علمي رياضية- خلال الوقفة الاحتجاجية، على أن (امتحانات الفيزياء والتفاضل جاءوا في غاية الصعوبة، وبعد تسريب امتحان الديناميكا وجدنا انها كانت سهله جدا لكي تعوض الامتحانات السابقه، وفقام وزير التعليم بإلغاء الامتحان، طيب احنا ذنبنا ايه في كل ده، وكده مش هنلحق تنسيق الكليات باللي بيحصل ده".

جاء ذلك أثناء الوقفة الاحتجاجية التي نظمها عدد من طلاب الثانوية العامة بالبحيرة أمام مقر المديرية الرئيسي بدمنهور، لاستيائهم من قرار وزير التربية والتعليم بإلغاء امتحان الديناميكا وتأجيل بعض المواد.

وأضاف الطالب محمد مهدي "قابلنا وكيل وزارة التربية والتعليم بالبحيرة بكل احترام وتقدير، وعرضنا عليه مطالبنا، فرد بأنه سيرسل مطالبنا لوزر التربية والتعليم اليوم للنظر فيها، وسيكون الرد من خلال مؤتمر صحفي، أزاي الوزير عايز يلغي امتحان الديناميكا علشان اتسرب، طيب ما باقي الامتحانات اتسربت، يبقي الاول يلغي كل الامتحانات ويعديها كلها من جديد، او يعمل اختبار قدرات، كده دفتنا الوحدية اللى هتتظلم، ونحتاج الرد سريعا علشان نعرف مصيرنا الايام الجاية".

كما أضاف عمرو محمد نعيم، طالب بالثانوية العامة قسم علمي علوم "في امتحان اللغة العربية استلمت ورقة الأسئلة بعد نصف ساعة من الوقت الرسمي، وكلمت مراقب اللجنة هددني انه هيعملي محضر شغب ويسحب مني الورقة، كده في 20 درجة ضايعين مني، واتظاهرنا اليوم أمام مديرية التربية والتعليم بالبحيرة، لإرسال مطالبنا ونقدم تظلمتنا بمنع كافة وسائل الغش الموجوده،لما يكون في لجنة في محافظة أسيوط بيدخلها أبناء المستشارين والقيادات التنفيذية بالهواتف المحمولة ويغشون براحتهم أين فرص التكافؤ".

كان قد تظاهر عدد من طلاب الثانوية العامة بالبحيرة، أمام مقر مديرية التربية والتعليم بدمنهور، احتجاجا على قرار وزير التربية والتعليم إلغاء امتحان الديناميكا وتأجيل بعض المواد وأعربوا عن رفضهم لقرار إعادة الامتحان، مرددي الهتافات "مش هنخاف مش هنطاطي احنا كرهنا الصوت الواطي، عايشين فيها بقالنا سنين قتلوا الفيزياء فين الدين، يا وزير قول الحق قرارك غلط ولا لا،يسقط كل نظام تعليم، عايزين طالب يبقي بهيم، ياللي بتسأل احنا مين، احنا الطلبه المظلومن، احنا مش لعبة فى أيديكم".