مبقاش غير انتي يا لقيطة

انا اتربيت في ملجأ أيتام .. كبرت فيه .. ودلوقتي انا سني ٢٧ سنة وبشتغل والحمد لله .. لكن للأسف كل ما حد يقرب لية علشان يرتبط بيه برفض لأني مش عارفة ولا عندي الجرأة إني أقوله اني رباية ملاجئ .. محدش في بلدنا بيبقى واخد فكرة كويسة عن اليتيم عموما وعادة مع البنات والسمعة العامة عننا اننا بنات صايعة وملناش أصل وللاسف اقولك اني سمعتها مرة لما غلطت وإعترفت لواحد من المتقدمين لية بالزواج لما إختلفت معاه .. لما جيت اعتذرله عن الجواز قالي ( مبقاش غير انتي يا لقيطة ) .. لما انا لقيطة طيب فكر يتجوزني ليه ولا كان ناوي يلعب بية .. من يومها وانا ما عنديش أي إستعداد لا أواجه المجتمع بظروفي ولا ارتبط أصلا مع اني ربنا يعلم بحالي انا إنسانة برضه ومليش ذنب في اللي انا فيه .. نفسي أعرف انا بتحاسب على إيه وليه ؟ .. كل ذنبي اني إتولدت من أم معندهاش ضمير ورمتني او حتى زي ما الحيوان دة قالي اني لقيطة .. ربنا عالم انا عايشة بنفسية عاملة إزاي .. دة غير اني زي كل البنات نفسي اتحامى في ضهر راجل محترم ويعزني ويخاف علية ويقدر الظرف اللي انا فيه .. انا حاسة اني عايشة في وسط الناس وحيدة ومسجونة جوة نفسي كمان .. حاسة ان الدنيا سودة ولايمكن تكون غير كدة .. اذا كان البنات اللي قاعدين في وسط أهاليهم بيواجهوا مشاكل قد كدة في موضوع الجواز فما بالك انا ! .. والله ما عارفة أقول ايه غير احتسبت امري عند الله هوة اللي خلقني وهوة أدرى بية .. انا مش عايزة مساعدة ولا عطف لأنه إحساس بيقتلني ميت مرة .. أنا محتاجة دعوات كل اللي قرأ رسالي دي .. بس كدة وشكرا ليكي استاذة نيفين على سعة صدرك .