غنيم : قررت أخطب وأنا عندي 18 سنة ..والأب المصري : تاكل شيبسي
أوضح الناشط السياسي وائل غنيم منتقدا الطريقة التى يعامل بها الشباب فى فترة الخطوبة قائلا وأنا عندي 18 سنة قررت أخطب عشان أتجوز وأنا عندي 20 سنة .. طبعا كل العيلة عندي قالوا مجنون ومينفعش .
وتابع عبر موقع التواصل الاجتماعى فيس بوك بدأت أحاول أتقدم لكذا بنت مصرية سنها من سني أو أصغر مني بسنة وطبعا ممكن أؤلف كتاب كوميدي على ردود أفعال الأهالي والبنات اللي كنت باروح أتقدم لهم (منهم أب قال لي أنا لما حد بيتقدم لبنت من بناتي باقولهم قهوة ولا شاي بس بصراحة معاك انت هاسالك تحب تاكل شيبسي :)) .. المهم ولا كان فارق معايا وكنت برضه مكمّل بدون كلل أو ملل لحد ما خطبت بنت مصرية وأهلها على غير العادة كانوا مبسوطين جدا بي .. حصلت ظروف بعد كام شهر والخطوبة مكملتش (لأن البنت شعرت إني مش قد المسؤولية ولسه صغير وكده) .. ولما لقيت الطريق مسدود في الزواج من مصرية بدأت في البحث عن زوجة غير مصرية .. وشاءت الاقدار اني اتعرفت على مراتي عن طريق الانترنت في موقع اسلامي لأنها كانت مسلمة جديدة وبتحاول تتعلم دينها وبعد كام شهر من تعرفنا على بعض سافرت أمريكا واتجوزنا .. المهم في القصة دي كلها أنا اتجوزت وأنا عندي عشرين سنة زي ما كنت عايز بفضل من الله .. يعني من الآخر كده مش بازهق ومش هازهق وهاكمّل أي طريق بدأت فيه لنهايته طالما مقتنع انه صح
